Tuesday, November 14, 2006

ناصر...أصل ومليون صورة


تصادف في هذه الايام ان اشارك في كثير من الاحاديث حول الزعيم الراحل جمال عبد الناصر...ما بين مؤيد له ومعارض كلية له ...سواء معارضا لما قام به من أعمال أو لذات عبد الناصر...عبد الناصر الذي نحت جزءا من تاريخ هذه الأمة..والذي كان عند البعض بمثابة الملهم والصديق والاخ والاب الروحي في بعض الاحيان...منذ زمن وانا امتلك هذه القصيدة والرسم الكاريكاتوري بقلم أستاذ الاساتذة (صلاح جاهين) والذي كان واحدا من ابناء مدرسة هذا الزعيم....المشكلة ليست في تصديق او عدم تصديق ما يقال عنه....المشكلة الحقيقية تكمن في انه اذا كان هناك نوع من انواع التزييف التاريخي في رمز من رموز هذه الأمة كهذا الرمز..فباي رمز سوف اثق يعد اليوم
ناصر ..البطل ...العقل المدبر لثورة الكرامة....اول من جسد شعار (ما اخذ بالقوة لا يسترد بغيرها ) بحروف من ذهب..اول من ازدهرت في عهده الصناعة المصرية..وبني في عهده السد العالي...وعادت قناة السويس للمصريين بعد سنوات وسنوات من الغياب...وبايدي مصرية عربية...فارس هذا الزمن الذي كنت انا نفسي واحدا من من حلموا العيش فيه رغم ما رأته مصر من صعاب في هذه الفترة
هل هو؟!!! نفسه...ناصر....الديكتاتور...عديم الرحمة....المسؤول الاول عن نكسة بلاده الاليمة عام 67م...بطل مسلسل التنحي ومخرج اعظم المشاهد الخداعية في تاريخ امتنا الحبيبة...فارس الحديد والنار...ومحبط امال كثير من محبيه امثال صلاح جاهين وغيرهم
لا اخفيكم ان هذه الكلمات لا تمثل رايا اكثر من تمثيلها للمجموعة من الافكار الدائرة في ذهني...هل هذان الوجهان لجمال عبد الناصر...هما وجهان لعملة واحدة؟...وما حدث كان ناتجا عن تناقض ما في تلك الشخصية الاسطورة......ام ان هناك كفة واحدة راجحة والاخرى ما هي الا ذلك الزيف والوهم الذي عاشه كثيرا من ابناء هذه الامة سواء كان مؤيدا له او معارض ؟!!!....في حقيقة الامر...لم اعد اعلم شيئا...كل ما اعرفه جيدا..(ان اليوم الذي سوف ادرك فيه ان تاريخ مصرنا الحبيبة عرضى للتزييف والعبث..هو نفس اليوم الذي سوف يهتز فيه حبي لهذه البلاد...لان هذا الحب في كثيرا من الاحيان كان يتجسد في هذا التاريخ الذي لطالما كنت افخر به...مادمت لا املك حتى الان الحاضر المشرف الذي يعوضني عن هذا التاريخ)....واعتذر للاطالة
* 23/7/1972 الرسم والقصيدة بقلم صلاح جاهين وصدرت هذه القصيدة في جريدة الاهرم بتاريخ *
اما هذه القصيدة فمن تأليفي وهي بالعامّية بعنوان
--------------------
فــــــــــــــــارس
---------------
لكل باب حارس...ولكل طير وليفه
وانا وليفي فارس...وحريته كيفه
فجرها ثورة نار
والعدل وياه ثار
بقى ضيف على كل دار
ولما زمانهم دار
كسّر كلامهم سيفه
رفع اكبر ستار
عنه وبان زيفه
......
لكني مش عارف
.....
أنا صحيح محتار
.....
ولا أنااا خايف
........
!هواللي جاب العار؟
وباع أمل زايف
عاش بالحديد والنار
ولا أنا مش شايف!!
........
أكيد مانيش شايف
.......
ما هو لو جمال بلدي
بالوهم كان كدبة
يبقى اكيد بعدي
كل التاريخ لعبة
و خسارة يا ولدي
هتعيش حياة اغبى
...
والحق هيكون مسخ...وهتجري ورا طيفه
ولكل باب حارس...ولكل طير وليفه
وانا وليفي فارس...وحريته كيفه
..........
M.H.R

15 Comments:

Blogger Ehab said...

dear 7amed
المشكله في مصر ان المطلوب من كل زعيم انه يكون نبي . . . . منزه عن الخطأ عشان الناس تمشي وراه و تؤمن بيه
انا زيك بلظبط باحب ناصر جدا بس هو في الاول و لا في الاخر بشر ....عمل حاجات كويسه و حاجات وحشه
احسن اسلوب لتقييمه هو انك تشوف انهي اللي فضل له تاثير اكتر حسناته و لا سيئاته . . . تشوفها بدماغك انت مش بدماغ و لا كلام حد تاني

8:36 AM  
Blogger moslma said...

نفس الافكار التى كانت تدور فى ذهنى
و لكنك طرحتها بشكل جميل و محايد
فهل هو فعلا شخصية دكتاتورية كانت تتخفى وراء الاشياء الجميلة التى فعلها؟!
هواللي جاب العار؟
وباع أمل زايف
عاش بالحديد والنار
ولا أنا مش شايف
.............
ما هو لو جمال بلدي
بالوهم كان كدبة
يبقى اكيد بعدي
كل التاريخ لعبة
و خسارة يا ولدي
هتعيش حياة اغبى
..........
للاسف قد تكون هذه الحقيقة

6:34 PM  
Blogger we2am said...

esh6a..e7na fe3lan me7taren zayak..b3eed 3an elnasryen..wel sadtayen"mafesh 7ezb esmo kida bs by7awlo" ana mesd2a eno kan dektator..shwahed kter..w hekal nafso 7bebo 2al kida..mmken tkon leh mobrrato..nezam na7n fe 3onq elzogaga w bta3..elle mesh radyen ne6la3 mno mn 50 sana..enma fel nhaya..yo7sb l3bdnaser eno 3aml masr da7'lyan w 7'argyan..w yo7sab dedo elle 2olto dah..w fe nhaya bashar..labod an yo7'62 ya3ni..dah 3'er eno kan warah zabanyet magles qyadet elsawra..dah modo3 tany b2a :)
والحق هيكون مسخ...وهتجري ورا طيفه
ولكل باب حارس...ولكل طير وليفه
وانا وليفي فارس...وحريته كيفه
a7la 7etta..e7m..abyat :D mn elqaseda..dayman by2l2ne..ene adwar..mal2esh el72e2a :S

12:43 PM  
Blogger مصرى said...

بص يا عم أنا حسمت أمري في الموضوع ده من فترة انا مع توجهات القومية العربية و التحيز

و القصيدة دي لعمك أبو النجوم اللي ياما أعتقل أيام عبد الناصر و السادات

على الضريح

السكه مفروشه
تيجان الفل والنرجس
والقبه صهوة فرس
عليها الخضر بيبرجس
والمشربيه عرايس
بتبكي
والبكا مشروع
من ذا إللي نايم وساكت
والسكات مسموع
سيدنا الحسين ؟
ولا صلاح الدين ؟
ولا النبي ؟
ولا الإمام ؟
دستور ياحراس المقام
ولا الكلام بالشكل ذا ممنوع ؟ !
على العموم
أنا مش ضليع
في علوم الانضباط
أبويا كان مسلم صحيح
وكان غبي
وكان يصلي ع النبي
عند الغضب
والإنبساط !
أبويا كان
فلاح تعيس
فى ليله ظلمه
خلفوه
وف خرقه سودا
لفلفوه
وف عيشة غبرا
طلعوه
وف عشه ما يله
سكنوه
ولصموه
وطلسموه
ودجنوه
وجهزوه
وجوزوه على عماه
فكان محير في هواه
ما بين أمي وما بين الجاموسة
وكان يخاف
يقتل ناموسه
وكان خجول
خجول
خجول
لكنه كان دايما يقول
أستغفر الله العظيم
من باب الاحتياط !

أبويا طلعتوه حمار
فكان طبيعي
يجيبني جحش
لا أعرف نبي
من أجنبي
ولا مين ما جاش
ولا مين ما راحش
موسى نبي
أبوه نبي
عيس نبي
أبوه نبي
كمان محمد كان نبي
ويا قلبي صلي ع النبي
وكلنا نحب النبي
وكل وقت وله أذان
وكل عصر وله نبي

وإحنا نبينا كده
من ضلعنا نابت
لا من سماهم وقع
ولا من مرا شابت
ولا انخسف له القمر
ولا النجوم غابت
أبوه
صعيدي وفهم
قام طلعه ضابط
ضبط
على قدنا
وع المزاج ظابط
فاجومي من جنسنا
مالوش مرا عابت
فلاح
قليل الحيا
إذا الكلاب سابت
ولا يطاطيش للعدا
مهما السهام صابت
عمل حاجات معجزه
وحاجات كتير خابت
وعاش ومات وسطنا
على طبعنا ثابت
وإن كان جرح قلبنا
كل الجراح طابت
ولا يطولوه العدا
مهما الأمور جابت

5:31 PM  
Blogger مصـ( الخير )ـعب said...

محيرة داشما دهاليز السياسة..

أنا زيك محتار بس أنا عندي أسباب أكتر

انا لقيت في فترة كتاب لضابط مخابرات أمريكي اسمه مايلز كوبلاند كاتب فيه تفاصيل علاقة ناصر بالـCIA

و في نفس الوقت في حاجات كتير حلوة عملها


هي دي السياسة يا ابني حيرة ما يعدها حيرة

أنا عن نفسي مريح دماغي من الموضوع ده تماما ما بأفكرش فيه أصلا

أنا يهمني أكتر مستقبل البلد دي، لأنها بتاعت جيلنا...

الأجيال اللي فاتت خلاص بح، فركش
مصر دلوقتي بتاعتنا.. مستقبلها مستقبلنا..

"ليس الفتى من قال كان أبي، إنما الفتي من قال ها أنذا"

أهم بالنسبة لي نبني قائد وقدوة و نموذج جديد، من إننا نقيم نموذج قديم،

وبعدين سيدنا علي بن أبي طالب قال جملة حلوة أوي أوي :
"لا تعرف الحق بالرجال، ولكن اعرف الحق تعرف أهله"

أسيبك دلوقتي
ويا كابتن يا باشمهندش أنا حطيت ليك لينك عندي ومستنيك هناك

4:13 AM  
Blogger frozen love said...

اسف على التاخير في الرد على تعليقاتكم الجميلة بس انتم اكيد مقدرين ظروف الامتحانات وكده


ehab:الحقيقية انا معاك طبعا وهو ده اللي انا عملته واختفظت برايي كمان...كل الفكرة اني كنت بطرح التناقض ده عشان الموضوع كحدث تاريخي مش عشان ناصر...خايف على تاريخنا ليكون فيه تزييف فعلا..وشكرا ليك

moslma:شكلا ليكي جدا على رايك في البوست من حيث حياديته واسلوبه...واتمنى ان لا تكون هذه الحقيقة

we2am:عندنا طول عمرنا يا وئام عنقين زجاجة...واحد للسياسة والتاني للتعليم...غير رقبة قزازة عمنا صلاح طبعا...وانا الحقيقة رغم شواهد كتير رافض اني اشوفه كلية بالسوء ده...يعني ممكن يكون صح انه ديكتاتور بس بنسبة...زي ما قلتلك كده..اما بالنسبة لذوقك في اختيار الجزء ده فانتي عارفة رايي طبعا

مصري:
من منا لا يحلم بالقومية العربية...وشكرا ليك عالقصيدة اللي انا حافظها عن ظهر قلب...لاني فيها الفاظ مبدعة من الناحية الفنية..اشكرك


مصعب:
"لا تعرف الحق بالرجال، ولكن اعرف الحق تعرف أهله"

يا سلام عليك يا ابو مصعب...سكت سكت وفجاة قلت حكم...فاهمني انت طبعا..وشكرا انك حطيتلي لينك..وده الل انا هاعمله...وهتلاقيني هناك كتير ان شاء الله بس نخلص من زحمة الامتحانات دي

2:23 PM  
Blogger مـحـمـد مـفـيـد said...

يا عم انت باين عليك هتودينا ورا الشمس
لكل رئيس سابق لابد من ان نأخده كده علي بعضه يعني انا بحب السادات وبحب عبد الناصر وستجد اختلاف كبير بينهما لكن المشكله ان كل زعيم فاكر نفسه منزل ولا يمكن ان يخطأ

3:39 AM  
Blogger hOby said...

naser..
be sarf el nazar 3an ay 7aga ba7eboh!
e7sas en da sha'7seya mo7tarama mawfoor el karama akbar men '3alatatoh yemken! mama kanet bet7kely ayam zaman lama kano ye3rafo en naser haye2ol '7etab tela2y el nas kolaha mestaneyah sam3ah .. tefteker da mawgood delwa2ty?!!

7:45 AM  
Blogger aliaa abdalfatah said...

مش عارفة ليه مش بثق في اي زعيم او سياسي مهما كان

1:56 AM  
Blogger frozen love said...

محمد مفيد:
انا معاك بس اتمنى تمون المشكلة مشكلة تقييم شخص مش تزييف تاريخ حديث لامة عريقةزي امتنا (العربية مش مصر بس)

ومتخافش من موضوع الشمس ده...احنا بنتكلم بس...شكرا لرايك

hoby:
i know what ufeels...ana betna kan beydor feh nfs el7warat dyman...wana f3lan b7trmo..bs btr7 elmwdo3 llmnaksha nateget elly wesltlo
thx

alia ablfata7:
لا تعميم عدم الثقة مش مطلوب خالص...لاني التاريخ مليان نماذج هي الثقة ذاتها...وشكرا ليكي

3:01 AM  
Blogger dead man said...

علي الرغم من أني مش ناصري بس حبيت الراجل ده علشان عمل حاجات كويسة للبلد
تعرف أنا دخلت قبل كده مصنع غزل ونسيج حلوان .. تفتح دولاب اى عامل تلاقي جواه صور عبد الناصر من غير ما يكون العامل ليه أى فكرة في السياسة

ودخلت الأوضة بتاعت الكهربائية لقيت فيها حوالي 4 أو 5 صور لعبد الناصر

وأنا متفق مع مصعب تمام

4:46 PM  
Blogger nour said...

بص انا عندى وجهة نظر فى الحوار ده..الاول بس عايزة اقول ان انا ناصرية من بيت ناصرى يعنى كل خطب و شرايط و صور عبد الناصر شغالة فى البيت الله ينور..و انا كبرت لقيت عمى الله يرحمة بيعلمنى احب عبد الناصر ازاى..قلتله يا عمى هو مش ده الراجل اللى اعتقلك و بهدلك..قالى آه بس بحبه برضه الحقيقة مهمتش كنت صغيرة..و لما كبرت شوية و اتحررت من انى اكون بحب عبد الناصر بس علشان عيلتى ناصرية بدأت اكون رأى خاص..الاول عايزة اقول كلمة سير ويليام والاس فى القلب الشجاع لما قال فى اول الفيلم ان التاريخ بيتكتب بأيدى الذين قتلوا الابطال..علشان كده انا مبصدقش اى كلام يتقال..ثانيا بالعقل كده.البلد كانت فى أزمة و حرب و فى هدف الناس ملمومة علشانه..و أكيد كان كل تفكير الراجل ده ازاى يطلع من الحرب دى..لا كان عنده وقت و لا رغبة و لا ظروف تساعده انه يكون حرامى و لا ديكتاتور و لا و لا..و فى نفس الوقت مكنش فى قدرة عند البلد انها تتشتت ما بين احزاب و اخوانجية كان الهدف اللى مسيطر عليهم ان البلد تكون ليهم و بتعاليمهم و بعدين نبقى نفكر فى موضوع التحرير ده..سلطة ايه اللى بتتكلموا عليها اذا كان البلد ضايعة..محتلة و كل يوم الناس بتموت..اعتقد ان اى قلب انسانى كانت هتحصل فى ايامه مذبحة بحر البقر مش ممكن كان هيفكر فى حاجة غير يطلع البلا ده ازاى من بلده..كمان مكنش ممكن نتحرر و كل البلاد العربية محتلة..كان لازم يكون فى وحدة الاول علشان نقدر نقوم..و دى كانت غلطتة لما انشغل و وثق فى ناس الحقيقة حقه انه يثق فيهم انتوا فاهمين يعنى ايه اصحاب حلم واحد اشتركوا فى تحقيقه و نجح كان طبيعى انه يثق فى الضباط الاحرار..بس مكانوش قد الثقة دى..هو الكلام يطول اصلا و انا كتبت المختصر ممكن متفهموش حاجة بس يعنى بنحاول

7:33 PM  
Blogger frozen love said...

dead man:
في الواقع الامر انت مش لازم تكون ناصري عشان تكن كل احترام وتقدير للرمز الكبير ده..وده اللي مبيختلفش عليه اتنين..حتى اعدائه



nour:
لا رايك وصل طبعا...وانا معاكي في اني لو في تزييف فعلا هيبقى النسبة الاكبر منه من الناس اللي كانت حواليه اللي مش اهل لثقته دي..وانا عارف معنى انك تتربي في بيت ناصري كويس..ده يخليني اثق اني رايك اللي وصلتيله ..وصيلتيله بعمق وحيادية...لكن الخوف لسة مسيطر عليا برضه اني الحاجات البديهية اللي انتي قلتيها عنه تكون وهم كبير كلنا عشناه وهما عاشوه قبلنا...وكل ما اتمناه اني التاريخ يكون بيتكتب فعلا بايدين قتلة الابطال...مش بايدين الابطال الوهميين

9:02 PM  
Blogger LAMIA MAHMOUD said...

بص بقى انا لا بحب عبد الناصر ولا السادات ولا الثورة من اساسه

مالها ايام الملك .. الملك اتبرع بنص ثروته للبلد واللي جه بعده سرقوها
ايام الاحتلال كانت مصر مداينة انجلترا اللي هي كانت محتلاها

2:18 AM  
Blogger frozen love said...

lamia: l22222...msh leldargade..mlkya l2...rbna yg3l klamna khfef 3lehm..lol,ymkn klamk s7 bs e7sask enk b2ety 7aga bttba we tnshra...my3wdksh 3nh ay 7aga tanya

9:05 AM  

Post a Comment

<< Home