صور

دائما كلام عمنا فيلسوف ولاد البلد (صلاح جاهين) مش بس بيعزف على اوتار قلبي....ومش بس بعشقه وبيتردد في ذهني من وقت للتاني...لا ده انا ساعات بخده حكمة واصدقة وانفذه....خصوصا لما يديني الامل وينصحني اني ابدا صفحة جديدة وانسى احزاني وهمومي.....النهارده افتكرت رباعية ورددتها وانا قاعد كده

يا حزين يا قمقم تحت بحر الضياع

حزين أنا زيك و إيه مستطاع

الحزن ما بقالهوش جلال يا جدع

الحزن زي البرد ... زي الصداع

عجبي

بس المرة دي غير كل مرة!!...مقدرتش احسها زي كل مرة...مصدقها لكن مش قادر اعمل بيها...دماغي مليانة افكار ضد الكلام ده..وخيالي عمّال يودي ويجيب ويرسم في صور ويجيب ذكريات وكلها في منتهى الغرابة...متزعلش مني يا عم صلاح !!..المرة دي بس مش قادر...امانة عليك ما تزعل...حلفتك باغلى حاجة عندك..اللي انا وانت و بس عارفينها

صـــــــــــــــــــــــــــــــــّور

قمقم الأحزان.... كسّرته يا أبو صلاح
وحزني ده اللي كان ...لبّسته توب افراح

لكنه مخي عنيد...زي كتير من البشر
وخيالي لسه مريض...عمّال يرسم صور
وزمنها ياما بعييييد....ابعد كتيييير من القمر

رسم اول ما رسم....رسم عريس وعروسة
ورسملي وشه ابتسم....ودموعها محبوسة
قدر وامره اتحسم...وأنيابه مغروسة
كتب قلوب تتقسم...وبخطة مدروسة
صورتي مع الحاضرين!!.... من الكادر مقصوصة

اه من خيالي المريض..غاوي يفكر في اللي راح

و قمقم الأحزان.... كسّرته يا أبو صلاح
وحزني ده اللي كان ...لبّسته توب افراح

ورسملي تاني صورة..بهية غرقانة في نيلها
وقلوب ولادها محسورة...وقيودها ولا عارفة تشيلها
وانا اللي كنت ان زاد همّي... بمسح دموعي واغنيلها
صفوا الغجر بقية دمّي...وصوتي رايح مع ليلها

فوق يا خيالي المريض..ولملم الجراح

ده قمقم الاحزان..كسرته يا أبو صلاح
وحزني ده اللي كان ...لبسته توب افراح

وفضل يجيب ويودي...ويكمل الرسومات
منها اللي ما هوبيدي...ومنها اللي عدى وفات
وقعدت ابنّي في سدّي...بالموت والذكريات
عدّي يا حزن وعدّي..واوعى في عيني تبااات

لسة الدموع مش جليد...ولسا البكا مبااااح

وقمقم الأحزان.... كسّرته يا أبو صلاااااح
وحزني ده اللي كان ...لبّسته توب افراح

M.H.R