Monday, January 08, 2007

جسر


حزينة الشوارع..حزينة البيوت
وفينا المواجع..دفينة في سكوت
ده قلبي اللي كان ..رافض يغني
وده قلبي اللي جاي.. رافض يموت
وآدي قلبي
---
محمد حامد 2003
---------------------
الحقيقة انا كنت متوجه للكمبيوتر عشان اكتب قصيدة كنت ألّفتها من فترة صغيّرة..واللي خلاني أفكر اكتبها على البلوج صديقي العزيز. ...إيهاب عصام ..كانت عجباه..فيها كده دعوة للأمل على غير عادتي طبعا.. وكانت هتبقى جزء من البوم الصحبجية المنتظر في الحفلة الجاية ان شاء الله...لكن دلوقتي موضوع الالبوم اختلف ومبقتش دي منهم وبقت اغاني الالبوم بتدور حوالين فكرة تانية هبقى اكلمكم عنها ان شاء الله أول ما عمّنا ميشو (محمد إسماعيل) ... يخلّص تلحين الأغاني..المهم كنت شرعت فعلا في كتابة القصيدة اللي قلتلكم عليها دي..وفي نص الكلام..حسيت كأني برّد على كلام قلته قبل كده...قعدت افتكر...مش فاكر...جبت المذكرة القديمة والدفتر والفايل وبصيت .. مش لاقي حاجة معناها يأكد الكلام ده..او يفسره او يفسر الاحساس اللي جالي ده...بس انا حسيت اني متاكد ..ورغم كده..قلت ممكن يكون مجرد احساس او يمكن كلام حد تاني ماثر على تفكيري في الوقت الحالي...واقبل ما اقفل الفايل..لقيت صفحة مكتوب عليها بخط الوان كبير (مشروع رباعيات) ومشروع دي طبعا لاني مملكش الجرأة لا وقتها ولا دلوقتي اني اقلكم بصّوا الرباعية دي وقولولي رايكم فيها ايه!!!...الرباعيات دي حاجة اقترنت بعمّنا واستاذ الاساتذة
صلاح جاهين...وجوّه الصفحة دي لقيت الاربع سطور اللي فوق دول...وفعلا لقيت اني القصيدة اللي قلتلكم عليها دي رد او تاكيد على السطور دي...وكاني كنت حاسس اني همّر بالمرحلة دي..اللي اقدر اطلق عليها وضميري مستريح انها مرحلة انتقالية ما بين الياس والامل..الأربع سطور دول فعلا رغم ضعفهم من الناحية الفنية الا انهم بيمثلوا هذا الجسر بين ضفتي الامل والياس في حياتي ..على الاقل في المرحلة دي...والقصيدة اللي قلتلكم عليها دي واللي هاكتبها دلوقتي اتمنى تكون بتعبر عن اولى خطواتي الواثقة لعبور هذا الجسر
------------
ياللى الزمن هدّك
وايديك على خدّك
الدنيا مش قدّك
ولا انت مش قدهااا
عمّالة بتشّدك
ونفسها في ودّك
وانت السكوت ردّك
الأسوة كان ردهاااا
---
ياللي انت قلت الاه
الدنيا فاردة ايديها
قوم سلّم عالحياة
ولا تسلمش ليها
حاول واصرخهاا ..لاااااا
يمكن كده تراضيهاا
تستاهل دي الحياة
نقوم علشان عينيهااا
---
يمكن حاولت صحيح
بس الزمان صدّك
ووقفت وش الريح
وجه الطوفان هدّك
على قد ما انت جريح
خلّي الامل ردك
----------------
M.H.R
ويفضل في قلبي نفس السؤال
هو احنا الدنيا مش سايعانا من الفرح...ولا احنا اللي مش قد احزانهاااا

27 Comments:

Blogger dead man said...

ممكن تكون هي اللي مش قد أحزاننا

3:18 AM  
Blogger يا مراكبي said...

ودي برضه عجبتني كتير .. وخصوصا إنها معدة خصيصا للغناء

وغير كل ده بأتمنى لك إنك فعلا تكون متجه للمود المتفائل .. ده هايكون أحسن لك كتير في حياتك .. هي أصلا مش ناقصة غم خالص

12:17 PM  
Blogger hebaz said...

This comment has been removed by the author.

1:42 PM  
Blogger hebaz said...

لاحظت فى بعض البلوجز العزيزه عليا موجة من الأمل و التفاؤل و أكيد ما كتبتة مؤخرايا محمد و خصوصا أنها أغنية:) أكد عندى هذا الأحساس الجميل
فعلا الحكاية مش ناقصة غم و بعدين ما تيجوا نعمل دعوة للتغيير و التفؤل ما أحنا بئالنا كتير مغمومين
يمكن لما نتفائل الدنيا تبقى أحلى و تجيلنا تجرى لما تلاقينا مش فارق معانا و مقوينا كل الى بتعملة فينا
تحياتى :)

1:44 PM  
Blogger حنيــــــن said...

ومشروع دي طبعا لاني مملكش الجرأة لا وقتها ولا دلوقتي اني اقلكم بصّوا الرباعية دي وقولولي رايكم فيها ايه!!!...الرباعيات دي حاجة اقترنت بعمّنا واستاذ الاساتذة صلاح جاهين

تسمحلى اختلف معاك ؟

مين قال ان العباقره مش بيتكرروا ؟
مش لازم يكونوا طبق الاصل وده مش مطلوب برده
بس ممكن حد يطلع ويتميز كمان عن جاهين
هو قبل جاهين كان فيه مين ؟
:)

عجبتنى الرباعيه بتاعتك اوى
بجد بجد جميله

5:42 PM  
Blogger Ehab said...

heya de ely kont ana mestanehaa mn sa3et lama shoftha 3la el mobile m3 hobs
rabena ye7'lek
we rabena ye7'ley hobs
:D :D :D :D :D :D :D
la2 tab3n e7na ely mesh a2ed a7zanha

9:16 PM  
Blogger smraa alnil said...

هي فعلا مش اد احزاني


بص
انا كنت بقرا كلامك وانا بسمع الموسيقي ال حاطاها عندي
وفعلا حسيت ان الدنيا مش اد احزاني

وكلامك بجد اثر فيا اوي
وخلا عين تدمع
محسوسة اوي وتلمس اوي

انا بقول الاه
بس عمري ما شفت الدنيا بتبتسملي
بقول الاه
ولا عمرها ممدتلي اديها
تفتكر اني انا اللي مش شايفة اديها
اتعميت
ولا الدنيا ضلمة اوي وانا ماشية مش عارفة طريقي فين
حاولت بجد
بس الزمن كان كفيل انه مش بس يهدني
لا دة يخليني ميتة
قاسية
بحس اني مش عارفة اعيش من غير حزن
عايزة اكون دايما لوحدي
بحضن نفسي والملم نفسي وبرضه مش قادرة
بستقبل لعناتي وبرضه مش قادرة
بصرخ من جوايا صرخة تشرخ البرق
وبرضه مش قادرة
صدقني بحاول يكون جوايا امل
بس ببص حواليا بلاقي سراب وخزن وكره وغدر
تفتكر بقي مين اللي مش منتمي للعالم دة
انا اللي مش من هنا
ولا الناس اللي جت غريبة
من اللي كان عايش علي كوكب تاني
انا ولا الدنيا
مين اللي بيكسر نفسه
مين اللي بيقتل حلمه
مين الي بيخلينا نسكن قبورنا
كلامك حلو بس مين قادر ينفذه
مين قادر ينفض توبه
ومين قادر يكسر طوبه
والزمن هدني
ولا لاقية حد يشدني
والامل دايما بيصدني

بنضحك
ما هو هنعمل ايه غير كدة
بضحك وعيوني مليانة دموع والم
مقهورة قهر المظلوم ولا لاقية حتي حضن الام
اقولك ايه بس
منك لله يا شيخ

بص
يا ريت تمسح تعليقي دة
لاني مش هستحمل اني اقراه تاني
ولاعايزة حد يقراه
وفي نفس الوقت مش قادرة امسحه انا
وياريت مش تسالني ليه
بس بجد كلامك تحفة اوي
ربنا يسعدك يارب ويبعد عنك كل حزن ودموع

10:19 PM  
Anonymous Anonymous said...

begad elkaseda to7fa we elroba3ya bardo to7fa we begad mabsota enk da5alt mar7alet el tfa2ol we mestanya ashof ta2ther da 3ala kol ketbatak we 3ala shakl el blog kman (leh el aswed da 5alyna neshofha bamby )
ana ma3ak ya ehab a7na elly mesh 2ad a7zanha

10:20 PM  
Blogger Ehab said...

sohef ya ebny daha tany comment fe nafes el post we daha 7adeth nader awy
enta begad mesh momken tet7'el el kalam daha mn sa3et lama shofto awel mara we howa 3amel feah eah ????
gamdaaaa awy awy awy awy
ana bakol teseb el handasa we el seka el 7aded we el magarey de we terkez fe el she3er
keda hankseb sha3er gamed awy
we han7'ser mohndes nos leba ( zayena keda be el zabt :D)

12:47 AM  
Blogger frozen love said...

dead man:
هو جايز برضه متبفاش قد احزاننا..لكن ان في الحقيقة قررت تبقى مش سايعاني من الفرح بعد كده
تحياتي


يا مراكبي:

انا سعيد قوي انها عجبتك..وفعلا ان شاء الله انا باتمنى افضل كده..اكيد احسن

منورنا
تحياتي


hebaz:
انا معاكي قلبا وقالبا...وزي ما اتفقنا...هنحاول نشيع هذه الموجة بين الناس..مبسوط قوي انها عجبتك

بشكرك


حنين:

متفق معاكي..بس اللي اقصده اني الفرق بين المرحلة العمرية والخبرة الحياتية اللي أهلّت جاهين لكتابة الرباعيات..لم اكتسبها بعد...لكن انا متفق معاكي كلية..لازم يكون طموحنا مالوش حدود في اي مجال من المجالات سواء كان هذا المجال مهنة او هواية..اتمنى اني ابقى زيه واحسن

وسعيد قوي اني كلامي عجبك
ودائما منورانا كده

تحياتي


ehab:
rdan 3la el 2 comments b2a..ana msh 3arf ashkrk ezay wlahy 3la r2yk...ana mbsot awy eny fe 7aga lya 3gbt 7d leldrgade..we nfsy elklam b2a y2sr bgd feek we tegy m3aya fe rabtet elaml de...lol

belnesba eny mohands nos leba aked mnkrsh..we awl mategy elfrsa ab2a sha3r..htgh 3la tool....lol

ed3ely aba2a mohands bs elawl..leba nos leba..mgary..wallah ma btfrg m3ana....lol

rbna m3ana
we thx awy

smraa alnil:

اولا انا بشكرك جدا على التعليق..وانا فكرت اعمل زي ما انتي قلتي..لكن مقدرتش...اولا عشان انا عمري ما مسحت تعليق قبل كده غير تعليقاتي انا نفسي لو في غلطات اوحاجة...وثانيا لاني كعادتك
طبعا..كلامك مؤثر جدا

بجد احساسك عالي فوق ما تتصوري..انا بعرف االكلام الي مكتوب باحساس..فبرضه زيك مقدرتش امسحه..نجيب حد يمسحهولنا بقى

وبالنسبة لمعنى كلامك فهو بس بيعبر عن حالتك في الوقت الحالى ممكن نتيجة تراكمات وممكن لمجرد انها حالة وجت لينا زي اي حد بتجيله وميعرفش ليه...لكن انا عارف انك من جواكي اقوى من كده

وانا عرف والله انك حاولتي كتير ومعرفتيش زي ما انا قلت كده

يمكن حاولت صحيح
بس الزمن صدك
ووقفت وش الريح
وجه الطوفان هدك
على قد ما انت جريح
خلي الامل ردك

ده بقى اللي قصدته..حولي كل الحزن والياس اللجواكي ده لامل..ومقصدش انك تصحي الصبح فجاة مليئة بالامل..لا طبعا..بس ممكن تصحي وجواكي رغبة تعملى كل حاجة حلوة وكل حاجة بتحبيها لحد ما الكويس اللي جواكي يكتر عن الوحش...وشوية شوية الابتسامة المزيفة تبقى من القلب

تحياتي وبشكرك على رايك في القصيدة
وربنا يسعدنا كلناا


anonymous:
ana kman mbsoot awy enha 3gbtk...we thx awy,we ensha2 allah ht7sy bfr2 fe ktabaty nateget elamal da...we 7ta lw e7na msh 2d 27zanha..n2dr n3afr..we gayz tb2a msh say3ana mn elfr7

thx
t7yaty

1:38 AM  
Blogger mariam said...

عايزه اقولك حاجة مفيش مانع انك تكتب رباعيات
طبعا كلنا بنحب صلاح جاهين
بس مش معنى كدة ان محدش تانى هيكتب رباعيات حلوه
بس كويس انك متجه لمود التفاؤل
اكتب كل اللى نفسك فيه

2:11 PM  
Blogger كلمه said...

saba7 elfol ya x-lance

2na 2oltelak 2bl keda enaha gamda teneeeeeeeeen .... ba2et tetfa2el 25eran ya sh2ee2 :D
7ta elly 2oltoholak 2bl keda tele3 fakra ..lma 2aret.ha tany la22et eno mynf3sh ..heya etkatabek keda w 5alas

PS: TO SAMRAA ELNIL
eih elly enty katbaaaaaah da :) gamda 2a5er 7agaaaaaaa
zy ma 2alek FROZEN LOVE bezabt ..mesh hazawed kelma 3la elly 2alo

10:36 PM  
Blogger frozen love said...

we2am:
ksbna salat e;naby..lol,thx awy ana 3rfy r2yk y3ny in detail..isa waiting elbook we elghlaf 3leky b2a


mano:
ana m3ak zy mana 2lt l7nen kda...ana tmo7 bs elkhbra lsa tnksny lktabt 7aga b3zmt elrba3yat kda...bshkrk kter...we isa nfdl klna fe mood eltfa2l


kelma:
sba7o ya sh2e2...allah ykhlek ya brems...thx awy enk aydtny lama 2retha tany..we shoftny wna mtfa2l!!..3eb 3leek tol 3mry...lol..songs b2a 3la elblog we e7tmal akhleh abyad l3lmk ew3a weshk


pv: smra alnil:
shofty msh ana lw7dy ya engy...klamk 2ssr fe elkl...we el7md llah enk bttagawzy elmr7la de zy ma 2lty 3la ur blog

mnwrena ya gma3a wlahy

11:05 PM  
Blogger LAMIA MAHMOUD said...

الدنيا مش قدّك
ولا انت مش قدهااا

تفتكر الرد اية يا حامد انا بقول انها هي اللي مش قدي


عمّالة بتشّدك
ونفسها في ودّك
وانت السكوت ردّك
الأسوة كان ردهااا

وانا اسكت واطنش وهي تزيد فيها وانا اقول مش مهم وهي تكمل
مش عارفة بتفكرني باية الحتة دي

11:58 PM  
Blogger frozen love said...

lamia:

ana eftkrt kter..bs now b7awl akrr b2a enha mtb2ash 2d ely gwaya...ya ret klna n2dr

ana btfkrny 3moman bay 7aga 3n elamal bs b2slob khtab y3ny

thx
t7yaty

6:53 PM  
Blogger sofinqoraso said...

هى الدنيا صعبة ولا انا اللى مش عارفة اعيشها
ده بقى السؤال اللى كنت بسأله لنفسى وهو قريب من سؤالك
الرباعيات جامده واسلوبها يشدك
اتمنالك التوفيق

8:22 PM  
Blogger دينا فهمي said...

حلوة أوي بجد
وصحيح صلاح جاهين رباعياته حلوة أوي وفي ناس كتير حاولوا يقلدوه وفشلوا
لكن في ناس حاولوا يكتبوا في الفن ده ونجحوا
واعتقد انك منهم

3:13 AM  
Blogger frozen love said...

sofinqoraso:
سؤالك بنفس معنى سؤالي تقريبا...يا رب نعرف نعيشها بقى..وبشكرك كتير على رايك في كلامي

dina:

دي شهادة اعتز بيها والله يا دينا...يا ريت فعلا ابقى من اللي قدروا ينجحوا في الكتابة

نورتينا بتعليقك
تحياتي

1:29 AM  
Blogger tamer afify said...

حلوة الأغنية يا محمد
ومعانيها قوية
تحياتي

4:52 PM  
Blogger smraa alnil said...

ادا ادا
انا مش كنت اعرف ان كلامي هيأثر علي كلمة كدة
يلا الناس بقت حسيسة
ههههههههههه
يا لهوي هو انا كنت كاتبة النكد دة كله
انا مش خدت بالي من اسمي
فجاية اقول الكلام دة مش غريب عليا
ومين النكدية دي
طلعت انا
ههههه
يلا اهو كله بيعدي

9:37 AM  
Blogger frozen love said...

tamer afifi:

اشكرك جدا على رايك فيها...ومنورني دائما

تحياتي

smraa aalnil:

klamk da kan lazm y2sr fe ay 7d y2rah..lol

wla nkdya wla 7aga klna beygelna l7zat kda...khleha 3la allah

mnwrany

11:06 AM  
Blogger hurricane_x said...

This comment has been removed by the author.

8:16 PM  
Blogger hurricane_x said...

على قد ما انت جريح
خلّي الامل ردك
keda 2enta gebt mela'7er.
I see hope here,..is there anything wrong?!
hope u r always fine ya man :)

8:16 PM  
Blogger Oma said...

جميله اوي على فكره...بجد اسلوبك جميل وبسيط وفي نفس الوقت متظبط ودقيق

احييكي !

10:56 PM  
Blogger frozen love said...

hurricane:

ah t2reban fe 7aga ghlt..ana 3yan aw 7aga...lol

thx f3lan akhr gz2 da hwa elmfta7 fe r2yee

thx


oma:
متشكر ليكي جدا وبشكرك على رايك ده في الاسوب كمان

واتمنى تنورينا على طول

تحياتي

11:25 AM  
Anonymous Anonymous said...

السلام عليكم .. ايه ده يا بنى انا مش عارفه هما ازاى سايبينك لحد دلوقتى وما اتخطفتش كده عشان تمتعنا اكتر بكلامك الجميل ده المفروض دلوقتى انك تبقى واحد من الشعراء اللى بنقرالهم!!! القصيده فوق الفظيعه وبتدل على انك بتحاول تخرج من حاله الحزن اللى كنت فيها بس عايزه اقولك ان حاله الحزن دى طلعتلنا برده قصايد حلوه اوى بتمنالك التوفيق واشوفك شاعر كبير قريب بطه البحر

7:56 PM  
Blogger frozen love said...

انا مش عارف اقولك ايه والله...بشكرك جدا وايدي على كتفك..لو تعرفي حد يخطفني..انا معنديش مانع
lol

لازم تنوريني في الحفلة بقى فيها الاغاني من تاليفي

تخياتي
ومتغبيش عني خالص انا مبسوط بتواجدك في المدونة

8:10 PM  

Post a Comment

<< Home