Saturday, February 03, 2007

الاولة اسف..والتانية تاج...والتالتة

الاولة..اسف

انا كنت مسافر كم يوم اسكندرية…ولسة جاي النهاردة..انا بجد بعتذرلكم عن التاخير في الرد على تعليقاتكم والتاخير عن متابعة بلوجاتكم الرائعة…وعايز اعترفلكم اني افتقدتكم فعلا..واول مرة اعرف قد ايه موضوع المدونات ده بقى جزء من حياتنا…وحشتوني كلكم


الثانية ..تاج

انا لسة بقول يا هادي وبشوف التعليقات وكده..لقيت التاج ده اتمررلي من مدونة "يا مراكبي"…وانا بشكرك قوي انك افتكرتني بالتاج…والتاج او التاجين بقى…اهم..بس يمكن مردش عليهم كلهم منعا للاحراج..هههه….
ردودي على اسئلتهم اهي…بس انا هكتب الاجابة بسرعة عشان مفكرش كتير بحيث اجابتي تكون اصدق ما يمكن


اية اللي حيحصل لايميلك لما تموت؟
بصراحة انتوا بتقلبوا عليا ذكريات اليمة كده...انا اصلا عارف فعلا ايه اللي هيحصل ليه...اصحابي القريبين مني هيفضلوا محافظين عليه مفتوح...زي ما انا واصحابي عملت مع اعز اصدقائي الله يرحمه..ويلحقنا بيه في رياض الصالحين ان شاء الله

اديت الباس وورد لحد قبل كده؟
اه اكتر من شخص...اللى دخلوا دائرة الثقة الصغيرة بتاعتي...من 5 سنين عشرة وانت طالع كده


كانت طبيعة علاقتك بيه ايه؟
اعز اصدقائي

اسمك؟
محمد حامد راشد..اسم فني فعلا..

اسم الدلع المشهور وسط اصحابك؟
حامد...ممكن ميدو..وفي البيت حمادة...وساعات حامد الجامد...واسامي تانية في ناس كتير هتضحك اول ما تقرا السطر ده...عشان الاسامي دي هاتيجي في بالهم "كلمة والسدغ والكرف مثلا"عارفين ايه هي الاسامي دي

عمرك؟
21 سنة و5 شهور وكام يوم كده...راشد فعلا يعني مش اسم بس

برجك؟
العذراء...الى كل رواد هذا البرج..ارجوكم..كفاية رومانسية وعبط

مجال دراستك؟
هندسة عين شمس...اخر سنة وبدعواتكم ان شاء الله هخلص وابقى مهندس مدني...ومحدش يستغرب على حوار الشعر ده...ده عشق خاص


شخصيتك نوعها ايه؟
توشيبا....اصل السؤال ده صعب بصراحة...انا ممكن اقول كوكتيل مشاعر زي أي بني ادم...لكن أي حاجة صعب اقولها عن نفسي...خصوصا اني شخصية عظيمة...ههه
لا بجد ممكن تقول اني هادي بطبعي وعكس كده ده تمثيل طبعا..رومانسي طينة..ودي ماساه...صريح..ودي ماساه اكبر منها...بحس قوي بالناس..وعيوبي متعدش...خجول...وساعات مباخدش الامور ببساطة...وكسول ساعات...دائما بابا يقولي كده وانا ااوحه طبعا بالفطرة والاجسام المضادة اللي جوايا...لكن معاه حق ساعات ببقى كسول فعلا....والموضوع كبير يعني...ممكن تقولوا انتوا رايكم فيّا بقى اسهل

السفر بالنسبة لك؟
خوفي الاكبر...وساعات حلم بيراودني

المود بتاعك؟
هو بقالي فترة كل الناس بتقول انه كآبة..مع اني بعمل طول الوقت عكس كده..الظاهر اني مبعرفش امثل خالص

وقت فراغك بتعمل فيه ايه؟
يا بكتب يا بقرا...يا مع اصحابي


الاكلة المفضلة؟
فراخ بالمايونيز...لا بجد بحبها..بس مش المفضلة هي اللي جت على بالي عشان كنت بكلها من شوية

الصفات اللي خدتها من بابا؟
المثالية!!..يعني كتير بلاقي نفسي ماشي زي ما الكتاب بيقول...مع اني الكتاب بتاعنا قديم قوي بالنسبة لحياتنا دي..لكن انا حابب ده زي ما هو كمان حابّه..وكمان خدت منه شوية حكمة على خفيف..وحنية كتير..وشوية ذكاء اجتماعي على خفيف برضه..قلق كتير..وعصبية كتير...واصول كتيييييييييييييير


الصفات اللي خدتها من ماما؟
الطيبة..والصراحة...وحب الحياة...لسة بيتكون عندي جديد حب الحياة..بس هي كلها حب للحياة

اكتر 6 حاجات بتكرهها؟
الاحباط
الغباء
الخيانة
نكران الجميل
الكدب
الحديث بالباطل..خصوصا في الدين


اكتر 6 حاجات بتحبها؟
مصر
اهلي
اصحابي
الشعر...بالذات صلاح جاهين
الحاجة الجديدة..علم..مجتمع..فكرة..تكنولوجيا.. زي ما تيجي
الحب نفسه


الشغل بالنسة لك؟

هدف...ووسيلة لتحقيق الذات..وممكن تحقيق الحلم كمان..وملل رهيب لو شغل روتيني او مبحبوش


ايه الكمبيوتر والانترنت بالنسبة لك؟
جزا لا يتجزا من حياتي....بكل الاوجه بقى

...


التاج التاني بقى..... الخمس حاجات اللي ماحدش يعرفها عني؟


كتبت اكتر من حاجة ورجعت مسحتها تاني...اصل الحاجات اللي محدش يعرفها عني اكيد مش هاجي فجاة كده واقولها..بس عموما انا كنت هاكتب حاجة عن امنية دفينة عندي محدش يعرفها خالص..تخص مهنة كان نفسي اطلعها..بس دلوقتي بقت طيف كده في خيالي..ممكن اسيبكم تخمنوا هي ايه!!


التالتة...اسكندرية..والبحر...والشعر


انا كنت ناوي اعمل الزجلية دي في تدوينة لوحدها..ولكن نظرا لانكم وحشتوني فعلا...فقلت اعملها مع التاج والتدوينة دي..وطبعا هتحمل مخاطرة اني التدوينة كبيرة وممكن تتظلم..ومتتقراش...لكن انا برضه هكتبها عشان انتوا وحشتوني

---------
خلصنا امتحانتنا وطلعنا على اسكندرية...وفي وسط التهريج والضحك ببص للحتة اللي انا قاعد فيها في العجمي..لقيتها مكان غالي عندي قوي وليه ذكرى كبيرة في قلبي...ورغم كده ماكنتش واخد بالي في الاول..عشان الشوارع شبه بعضها...لكن لما بصيت حواليا..اتاكدت...ايوه هو ده الشارع..وكان ورانا ساعاتها البحر...وكانت دقات قلبي عمّالة تزيد لدرجة اني سامعه...ووشي احمررررر...ما كنتش عارف اقوللها ايه..ولا ابدا الكلام ازاي...لكن فجاة....كل الكلام طلع مرة واحدة..ومن كتر لغبطتي اعتقد انها مفهمتوش كله..اصل قعدت حبّة اتكلم ومقولش حاجة مفيدة..لحد ما الكلام بدا يتوزن..وقلتلها كل حاجة...واديني بالصدفة جيت لنفس المكان تاني...وكاني مكتوب على جبيني..غير قابل للنسيان...اديت ضهري للطريق المرة دي وبصيت للبحر اللي المرة اللي فاتت اديته ضهري...وقعدت اكلمه ويكلمني بموجه اللي انا بعشقه...خرج مني الكلام ده...اللي معجبنيش قوي ..لكن كنت حاسّه قوي..واهم حاجة سواء الكلام وحش او حلو..انه طلع وخلاص..دي علامة صحية..واني انبسطت قوي في السفرية دي..دي برضه علامة صحية

------------------

فارس زمان
-------------------------
من زمن كنا هنا
من شهور
من ساعات
لأ من ثواني
وكوني كان مبدووور زهور
والسكات
عازف اغاني
----
نفس المكان
والبحر كان قدامي برضه
يومها داب قلبي حنان
وفضلت مستني في ردّه
ولما شوقه ليّا بان
انكتب في جبيني وعده
قلتله.. انه حبيبي
واني عمري ما احب بعده
---
واديني جيت
وفيت وعودي
قلتي يا ريت
نطيت سدودي
وبنينا بيت
وانتي شهودي
وفي يوم صحيت
---
مالقيتش عودي
ولا صوابعي بيعزفوا
ولقيت قيودي
وايديا دول اتكتفوا
اديني جيت...
وفيت وعودي
وفين وعودك
ليه اختفوا؟!
---
نفس المكان
وانتي مش جنبي
فارس زمان
ونبلي ذنبي
هرب الحصان
بعد ما طار بي
نط في بحور
بلون عيونك
وفات مهور
كتير بلونك
رسمالي ذكرى
... وابتسام
وقلبي ناسي ...لا ملام
لا أنتي اهلي ..
ولا انتي ناسي
ولا انتي
......
..........
خلص الكلاااااااام
-----------------------

M.H.R




34 Comments:

Blogger صفصف لادي said...

الله عليك يا محمد يا حامد يا راشد
الله عليك و بس
كفاية انك قلت
كفاية انك كتبت
لا يهمك تعجب مين و لا مين يقول لأ
هي حته صادقة منك
و انت بس اللي تقول بجد
احترت معاك و غلبت في الرد،مبقتش عارفة الموسيقى من المقدمة
ولا من اللي انخط ،بحروف محسوس فيها العشق و الوله و الصد
و ان كان حبك انتهى و بقى خيط في نهايات سما غروب ساعة شفق
ينشاف ما يترد
لقلب مليان خير
عمره ما نسي حبه
او بحره اللي اداه يوم ضهره
وما قاله في يوم هات او خد

انت رائع

تحياتي


لا يهم جمال الكلمات بقدر ما تهم صدقها و وقة الاحساس بالعشور فلذلك اقلك
اكتب يا اخي فلقد مضى عهد الاخذ
و دعك من الاغبياء اللذين لا يفقهون اصول الرد

5:44 AM  
Blogger صفصف لادي said...

بص عبال ما انا كتبت التعلق شكلك غيرت الاغنية

ماشي حلوة مش انا اللي ابكي
لكن مش بصوت غادة رجب السخيفة التقيلة على القلب
لو تقدر تجيبها موسيقى بس لعمر خيرت تبقى عملت خير و مبوظتش المود
اصلي عملت دماغ من كلامك و علقت
جيت اقراه تاني استمتعت برضو بس لغاية ما سمعت صوتها
لو مش غادة رجب تبقى واحدة باردة و تلمة زيها و في الحالتين يا ريت لو تغيرها
بس الاغنية نفسها تحفة

سلاموز

5:54 AM  
Blogger frozen love said...

حفصوتشا:

انا مش لاقي كلام ارد بيه على كلامك
الرائع ده

الحقيفي ده مش تعليق...ده قصيدة لوحده يا بنتي..بجد انا بشكرك بكل ما املك من مفردات وكلمات

------
اكتب يا اخي فلقد مضى عهد الاخذ
و دعك من الاغبياء اللذين لا يفقهون اصول الرد
-----
انا فعلا هاعمل بالنصيحة الغالية دي ومنوراني والله ومنورة المدونة دائما...انا على فكرة مبكرهش غادة رجب للدرجة دي..ليها حاجات حلوة...بس برضه معاكي حق في موضوع المود ده..انا حطيت فيروز رجعت الشتوية لحد ما الاقي حاجة انسب للمود العام للتدوينة..بشكرك للمر التانية على رايك

تحياتي

7:21 AM  
Blogger mano said...

بر ج العذراء زيي بصره

حمدالله على السلامه

و بجد مش عارفه اقولك ايه على الزجليه الجديده دى
كل مره احلى من اللى قبلها

تحياتى

10:54 AM  
Blogger Epitaph said...

استمتعت بجد
وانا بانتقل من تاج للتاني للمقدمة عن الرحلة و شنطة الذكريات للقصيدة

الرابط ما بينهم كلهم كان الصدق

begad..I enjoyed it all!!

:) 7amdelah 3al salama..and glad that you had some nice time there as well :)

2:12 PM  
Blogger كلمه said...

samdla 3l 7alama ya x-lance :D

واسامي تانية في ناس كتير هتضحك اول ما تقرا السطر ده...عشان الاسامي دي هاتيجي في بالهم "كلمة والسدغ والكرف

loooooooool kont ba3ayaaat w batsha2leb w basara5 w ba5abar rasy fel maktab mel de7k :D

shoof ya sh2ee2 .... elqaseeda gamda elteneen bs shofly 7al fe 7war twarod el5water da :D
eshta ya wla ya wlaaaa

3:09 PM  
Blogger مصـ( الخير )ـعب said...

أنا بقى ما كنتش فارس زماني
بس قلبي كان مليان معاني
دايب حنين، مليان حنان بيقول أغاني
بس آه منه الزمن.. آه ياني
عارف؟..حاسس وأنت بتتكلم هنا
زي ما تكون واقف مكاني



رائعة يا حامد

3:19 PM  
Blogger hebaz said...

أجمل ما يميزك الصدق و أن كل الكلام سواء التاج حتى الزجل كلة مربوط بخيوط رقيقة من المشاعر الصادقة التى تطل علينا مباشرة من القلب
مش مهم الكلمات المهم الإحساس
و أنا متأكدة أنه واصل لكل الناس:)

4:19 PM  
Blogger الوردة السوداء said...

على فكرة
انا لا قريت الاولى
ولا التانية
الثالثة بجد تحفة
جميلة جدا
جوها حلو

اه نسيت
الاغنية دى انا بعشقها

5:05 PM  
Blogger Ehab said...

a2ret el talata ya m3lem
اولا حمدالله علي السلامه .... كنت مفتقدك يا ريس كل يومين تلات اربع مرات هنا و مفيش حاجه جديده
و النبي ماتبقاش تغيب كتير يا استاذ
ثانيا : حلو قوي التاج ده .... بس احلي اسم ليك هو حامد الجامد
:D
و التالته : يا عم انت غلطان .... حد يدي ضهره للبحر عمره
ما تعرفش انه في الاخر مش هيبقي لينا الا البحر
بحر الاحزان
:(

7:18 PM  
Blogger يا مراكبي said...

أنا عارف إن القعدة قدام البحر بتعمل أكر من كده .. أنا مرة رحت إسكندرية 3 أيام قبل البكالوريوس .. رجعت كاتب ديوان شعر كامل فيه 8 قصائد ماكتبتش زيها لحد دلوقت

حقيقي أحييك على الإبداع الجميل ده .. ولو إنك كروت التاج

8:23 PM  
Anonymous maha said...

سلام عليك يا محمد
جميلة جدا شخصيتك و اروع ما فيها الصدق و الطيبة
كلماتك جميلة جدا
انا اعرف ان برج العذراء خجول و رومانسي
لا تتضايقك و خجلك لانه صفة جميلة و نادرا ما تتواجد في هذا الزمن بين الرجال و النساء
و لا تحزن من وجود شي من الرومانسية في حياتك لانها تهون علي المرء الكثير لا يهم ان تحب امراه فمن الممكن ان تحب الحياه البحر او كل شي جميل في الكون ...
اطلق العنان لكلماتك و احساسك و اكتب دون خوف

سلام
مها

9:31 PM  
Blogger frozen love said...

mano:

الله يسلمك يا مريم...كلكم ليكم وحشة والله...برج العذراء برضه يعتي الهم طايلني وطايلك..بشكرك جدا جدا على رايك في الزجل

منورة


epitaph:

ya slam 3la elt3berat elgamda..shantet elzkryat...allah 3leky
thanks awy ya epi we im glad eno 3gbk..we enky lmsty feh elsdk...we allah yeslmk
t7yaty


kelma:

mana katb kda mkhsos ya sh2e22 3shan tmoto mn eld7k..lol

ah msh 3arf a2lk eh..taward elafkar msh kda..lol...elso7bagya roo7 wa7da f3lan

thx ya wala ya wala


مصعب:

الله عليك انت يا ابني..بنبسط قوي لما حد يردلي بالطريقة دي..بحس اني كلامي اثر فعلا فيه

منورني يا باشا وبشكرك قوي


hebaz:

متشكر قوي يا هبة..واتمنى اني كل الكلام يوصل للناس
فاهماني انتي
negmayaa...lol

10:14 PM  
Blogger frozen love said...

الوردة السودة:

اشكرك كتير التعليق الرقيق ده...التالتة تابتة فعلا..المهم انها عجبتك..انا كمان بعشق الاغنية دي..وبحب اسمعها ورا حبيتك..تحسي انهم مكملين بعض...جربي وقوليلي رايك


ehab:
allah yslmk...wenta kman wlahy leek wa7sha kbera..we mbsoot enk knt bt3dy mn hna....aked a7la esm hwa 7amd elgamed...3shan 3la mdwntk elgamela...lol

2alak b7r el27zaan....enta yabny tl3t romantic enta kman...blash 3shan s7tk

mnwrny wlahy


يا مراكبي:

فعلا القاعدة قدام البحر والنيل بتعمل بلاوي...بس انا نفسي اقرالك حاجة من الحاجات دي على مدونتك الرائعة..يا ريت نشوفها قريب

maha:
انا بشكرك على تعليقك اللى عدى مرحلة الرقة بزمان ده...انا مش متضايق من الصفات دي..لكن انا بتمنى تعديلها شوية...ومعاكي كلية في موضوع حب الحياة والاشياء ده..متفق معاكي جدا جدا

وشكرا على زيترة المدونة وعلى نصيحتك ليا باطلاق العنان
يا ريت تكرري الزيارة وتنورينا

تحياتي

10:20 PM  
Blogger Mony The Angel said...

خلص الكلاااااااام
what i can say after that :(
al awal bas 7amdell 3alsalama w hope u enjoyed there (f)

11:42 PM  
Blogger Maat said...

ha2olak eh.. el kalam kollo et2al. 3agabetny awy..awy!

ba2a ya ragel teb2a f iskenedereya wel 3agamy kaman w mat2olsh, ana kaman kont henak... lessa rag3a today. w sob7an Allah... ma32en kol el nas 3arfa eny maleesh f alex awy, bas beteb2a GAMDDAAA fel shetta w heya fadya! 7amdella 3al salama :)

12:16 AM  
Blogger ياسمين said...

شكرا لصراحتك

جميل الزجل جدا

4:18 AM  
Blogger الملاح التائه said...

رغم ان البوست طويل
لكن قريته كله
لأنه شدنى
تعليقك عندي فى مدونتى عندي امل ساب اثر طيب جوايا من ناحيتك وحسيت انك مش زى اى حد انت مختلف
وفى الإختلاف يكمن المغناطيس الجاذب

زجلك سلس جدا وزى مانت قلت احساسك هو اللى صاغه مش لسانك

5:50 PM  
Blogger nour said...

هاهاهاهاها
لا اجاباتك حلوة
و الله حلو حوار التاج ده

7:01 PM  
Blogger Elsede3' said...

ya wala ya walaaaaaa
ya wala ya wala ya walaaaaa
asharrad walla balash???

waa3dy :P

1:28 AM  
Blogger Elsede3' said...

we yabny elnas lamma beta3mel tag lazem telabes elly 7awleeha fel7eet
labeslak kam wa7ed keda

1:29 AM  
Anonymous Anonymous said...

hobs: mesh 3arf yad ya 7amed kol ma agy aseblk comment b3od afkr aktb eh...w aslan ana lma bfkr fy 7aga aktbha btb2a baykha 3shan keda lma tla2eny mesh sayb comment yb2a ya hya gamda ya we7sha awyy w fil 7alteen mesh hala2y klam aktbo

1:33 AM  
Blogger frozen love said...

mony the angel:

dont say anything....lol..kl elklam wasal

mnwrany wlahy we allah yslmk


maat:

n2ol mn tany...allah ykhleky..im glad enha 3gbtk

bgd!!..khsara eny m2ltsh wlahy khsrt m3rft blogger ra23a zayk fe elreal life..bs elayam gaya kter...we el3agamy mwgoood zy ma hwa...
m3aky 72 alex fe elsheta fo2 elkhyal

ياسمين:

شكرا لمرورك..وسعيد انك لمستي الصراحة وعجبك الزجل

منورة


حبيبها انا:

احساسك بالاثر الطيب ده..ساب عندي انا اثر رائع بقى...مدونتك رائعة فعلا...وسعيد اني الاسلوب والكلام عجبووك

منورني ويا ريت تكررها

5:25 AM  
Blogger frozen love said...

nour:

hwa 7lw...bs fe tags btb2a m2lb t7n...thx 3la r2yk fe egabaty...

t7yaty


elsede3':

tsharad leah yad..lol,msh tfkk mn el7warat elaflam elonline de b2a..lol
we b3den ya wala ya wala..get albs eltag lnas...l2et kl elnas 3ndha aslan..2lt khlas..bra2a elmarade


hobs:

yady elcomments elghreba...lol

eshta ya sh2e2..thx brdo 3la r2yk fe el7agat el7wla...we r2yk ely mbt2olosh fe el7agat elw7sha..bs enta aslan btb2a bayn awy...fa2sk ya abo hobs ya tkheen enta...hehe

5:30 AM  
Blogger إنـســانة said...

حاولت آخد اكتر جزء عجبنى من فارس زمان لاقيت نفسى هاخدها كلها واحطها هنا واقولك تحفة

تحفة جداااااا

تسلم إيدك بجد

وتحياتى للبحر اللى بيفجر المدفون جوانا

9:49 PM  
Blogger Human said...

أول زيارة ليك ...بجد انا مبسوط اني اتعرفت عليك ...وأول حاجه أقرأها ليك تكون بالجمال ده...فعلا انت موهوب

12:07 AM  
Blogger عبده الكرف said...

-ALLAH yabny
*da bgd :D
*3gbk elpost?
-akeed
*ana 3gbny 3la b3do..bs elpoem 7assha msh 2d kda
*bs ana ktbtha wana 7ssha awy
-ana elly 3agbny feeha en kalamha yemken 2olayel bas bey2ol kteeeeeeeeeeer
-7asset enny ba2ra kalam kteer been el stoor.. w hena se7raha ba2a
*ya slaam 3leeek
*so7bagy f3lan yabny wlahy
-----------------------------
ana mal2etsh comment 3'eer el 7war elly dar benna bezzabt online sa3et ma 2areet el post.. ana fe 7aga ba7beha feek ya 7amed w yemken di el 7aga elly ma2oltelaksh 3leeha abl keda enny ba3sha2 sed2ak w shafayetak di.. bgad ba7ess feek bel bara2a wel naka2 elly mesh mawgoden fe zamanna da...
amma bel nesba le mawdo3 asma2 el dala3 da fa el ta3leek el wa7eed.. niahaahaahahaaaaaaaaaaa3... looooooooooooooooooool :D

2:21 AM  
Blogger we2am said...

tab ana afhm eh mn el qseda el 3'reba deh? :D
dah 3'er en egabtk fel tag esh6a w m3'lwsh 3la 7agat kter..fokak b2a mn 7warat elsara7a :P

8:35 PM  
Blogger frozen love said...

انسانة:

انا بشكرك بجد على طريقتك الرقيقة اللي وصلتيلي بيها اعجابك بالكلام ده...تسلمي انتي وتنورينا دائما


human:

يا رب ما تكونش اخر زيارة وتنورنا على طوول..شكر لييك قوي


عبده الكرف:
ya anwra enta dayman msbtny wlahy...allah ykhlek ya sh2ee2 akhgltm twad3na wlahy..bmwdoo3 elsd2 we elbra2a da...a7la 7aga tt2al lbny adam beyktb eno klamo 72e2y we mn el2lb...enst awy belcomment we tre2to elghreba de...lol..viva la so7bagya


we2am:

lw tfkk enty mny b2a...lol,mahy yakhty 7adr hafokny...elkaseda mfsra nfsha khals msh lghz y3ny...looool

1:13 AM  
Blogger el2ahwagi said...

ta3lee2 met2akhar ba3tazer 3an ta2kheero...

igabatak betnom 3an insaan aseel welkelma di telakhas kol 7aga..

wesalemli 3ala handaset 3een shams w 3abdo basha... :)

4:45 AM  
Blogger frozen love said...

تعليق منتظر...واعتذار مش في محله
lol

انت تنور المدونة في اي وقت...كفاية انك فاكرنا يا باشا

اصييل...الله...دي ممكن تكون احلى صفة حد يوصفني بيها

الله الله..عبده باشا وقلق...شكلك ليك ذكريات في ميدان الكلية عندي..قوول قوول..مش هاقول حد
loool

2:57 AM  
Blogger OMA said...

7elwa awiiii bas 3'atet 3la eltag w karweto :D

kol da men el ba7r..howa elba7r bey3mel keda...howa besra7a ye3mel aktr men keda kaman w ygeblk melion fekra w fekra..w elEbda3el gamel da yetla3

a7ayek :)

2:17 AM  
Blogger frozen love said...

mt2olesh l7d eny krweto b2a...lol

knt fakr eny 3detha....thax awy 3la r2yk elghaly da wlahy ya oma...we elb7r be3ml blawy tb3an...beyfgr elmsha3r ely gwana...thx again 3la wsfk eno ebda3

t7yaty ya gmeela

2:09 AM  
Anonymous Anonymous said...

هوا الكلام الى طالع من القلب لازم يوصل للقلب بيقولو كدا بس انا الكلام وصل لقلبي عملى قشعريره في جسمي عنيه دمعت ربنا يكرمك ببنت الحلال دعوه من القلب بردو؟؟؟؟بحبك في الله

6:25 PM  

Post a Comment

<< Home