الاولة اسف..والتانية تاج...والتالتة

الاولة..اسف

انا كنت مسافر كم يوم اسكندرية…ولسة جاي النهاردة..انا بجد بعتذرلكم عن التاخير في الرد على تعليقاتكم والتاخير عن متابعة بلوجاتكم الرائعة…وعايز اعترفلكم اني افتقدتكم فعلا..واول مرة اعرف قد ايه موضوع المدونات ده بقى جزء من حياتنا…وحشتوني كلكم


الثانية ..تاج

انا لسة بقول يا هادي وبشوف التعليقات وكده..لقيت التاج ده اتمررلي من مدونة "يا مراكبي"…وانا بشكرك قوي انك افتكرتني بالتاج…والتاج او التاجين بقى…اهم..بس يمكن مردش عليهم كلهم منعا للاحراج..هههه….
ردودي على اسئلتهم اهي…بس انا هكتب الاجابة بسرعة عشان مفكرش كتير بحيث اجابتي تكون اصدق ما يمكن


اية اللي حيحصل لايميلك لما تموت؟
بصراحة انتوا بتقلبوا عليا ذكريات اليمة كده...انا اصلا عارف فعلا ايه اللي هيحصل ليه...اصحابي القريبين مني هيفضلوا محافظين عليه مفتوح...زي ما انا واصحابي عملت مع اعز اصدقائي الله يرحمه..ويلحقنا بيه في رياض الصالحين ان شاء الله

اديت الباس وورد لحد قبل كده؟
اه اكتر من شخص...اللى دخلوا دائرة الثقة الصغيرة بتاعتي...من 5 سنين عشرة وانت طالع كده

كانت طبيعة علاقتك بيه ايه؟
اعز اصدقائي

اسمك؟
محمد حامد راشد..اسم فني فعلا..

اسم الدلع المشهور وسط اصحابك؟
حامد...ممكن ميدو..وفي البيت حمادة...وساعات حامد الجامد...واسامي تانية في ناس كتير هتضحك اول ما تقرا السطر ده...عشان الاسامي دي هاتيجي في بالهم "كلمة والسدغ والكرف مثلا"عارفين ايه هي الاسامي دي

عمرك؟
21 سنة و5 شهور وكام يوم كده...راشد فعلا يعني مش اسم بس

برجك؟
العذراء...الى كل رواد هذا البرج..ارجوكم..كفاية رومانسية وعبط

مجال دراستك؟
هندسة عين شمس...اخر سنة وبدعواتكم ان شاء الله هخلص وابقى مهندس مدني...ومحدش يستغرب على حوار الشعر ده...ده عشق خاص

شخصيتك نوعها ايه؟
توشيبا....اصل السؤال ده صعب بصراحة...انا ممكن اقول كوكتيل مشاعر زي أي بني ادم...لكن أي حاجة صعب اقولها عن نفسي...خصوصا اني شخصية عظيمة...ههه
لا بجد ممكن تقول اني هادي بطبعي وعكس كده ده تمثيل طبعا..رومانسي طينة..ودي ماساه...صريح..ودي ماساه اكبر منها...بحس قوي بالناس..وعيوبي متعدش...خجول...وساعات مباخدش الامور ببساطة...وكسول ساعات...دائما بابا يقولي كده وانا ااوحه طبعا بالفطرة والاجسام المضادة اللي جوايا...لكن معاه حق ساعات ببقى كسول فعلا....والموضوع كبير يعني...ممكن تقولوا انتوا رايكم فيّا بقى اسهل

السفر بالنسبة لك؟
خوفي الاكبر...وساعات حلم بيراودني

المود بتاعك؟
هو بقالي فترة كل الناس بتقول انه كآبة..مع اني بعمل طول الوقت عكس كده..الظاهر اني مبعرفش امثل خالص

وقت فراغك بتعمل فيه ايه؟
يا بكتب يا بقرا...يا مع اصحابي

الاكلة المفضلة؟
فراخ بالمايونيز...لا بجد بحبها..بس مش المفضلة هي اللي جت على بالي عشان كنت بكلها من شوية

الصفات اللي خدتها من بابا؟
المثالية!!..يعني كتير بلاقي نفسي ماشي زي ما الكتاب بيقول...مع اني الكتاب بتاعنا قديم قوي بالنسبة لحياتنا دي..لكن انا حابب ده زي ما هو كمان حابّه..وكمان خدت منه شوية حكمة على خفيف..وحنية كتير..وشوية ذكاء اجتماعي على خفيف برضه..قلق كتير..وعصبية كتير...واصول كتيييييييييييييير

الصفات اللي خدتها من ماما؟
الطيبة..والصراحة...وحب الحياة...لسة بيتكون عندي جديد حب الحياة..بس هي كلها حب للحياة

اكتر 6 حاجات بتكرهها؟
الاحباط
الغباء
الخيانة
نكران الجميل
الكدب
الحديث بالباطل..خصوصا في الدين

اكتر 6 حاجات بتحبها؟
مصر
اهلي
اصحابي
الشعر...بالذات صلاح جاهين
الحاجة الجديدة..علم..مجتمع..فكرة..تكنولوجيا.. زي ما تيجي
الحب نفسه


الشغل بالنسة لك؟

هدف...ووسيلة لتحقيق الذات..وممكن تحقيق الحلم كمان..وملل رهيب لو شغل روتيني او مبحبوش

ايه الكمبيوتر والانترنت بالنسبة لك؟
جزا لا يتجزا من حياتي....بكل الاوجه بقى

...

التاج التاني بقى..... الخمس حاجات اللي ماحدش يعرفها عني؟

كتبت اكتر من حاجة ورجعت مسحتها تاني...اصل الحاجات اللي محدش يعرفها عني اكيد مش هاجي فجاة كده واقولها..بس عموما انا كنت هاكتب حاجة عن امنية دفينة عندي محدش يعرفها خالص..تخص مهنة كان نفسي اطلعها..بس دلوقتي بقت طيف كده في خيالي..ممكن اسيبكم تخمنوا هي ايه!!


التالتة...اسكندرية..والبحر...والشعر

انا كنت ناوي اعمل الزجلية دي في تدوينة لوحدها..ولكن نظرا لانكم وحشتوني فعلا...فقلت اعملها مع التاج والتدوينة دي..وطبعا هتحمل مخاطرة اني التدوينة كبيرة وممكن تتظلم..ومتتقراش...لكن انا برضه هكتبها عشان انتوا وحشتوني

---------
خلصنا امتحانتنا وطلعنا على اسكندرية...وفي وسط التهريج والضحك ببص للحتة اللي انا قاعد فيها في العجمي..لقيتها مكان غالي عندي قوي وليه ذكرى كبيرة في قلبي...ورغم كده ماكنتش واخد بالي في الاول..عشان الشوارع شبه بعضها...لكن لما بصيت حواليا..اتاكدت...ايوه هو ده الشارع..وكان ورانا ساعاتها البحر...وكانت دقات قلبي عمّالة تزيد لدرجة اني سامعه...ووشي احمررررر...ما كنتش عارف اقوللها ايه..ولا ابدا الكلام ازاي...لكن فجاة....كل الكلام طلع مرة واحدة..ومن كتر لغبطتي اعتقد انها مفهمتوش كله..اصل قعدت حبّة اتكلم ومقولش حاجة مفيدة..لحد ما الكلام بدا يتوزن..وقلتلها كل حاجة...واديني بالصدفة جيت لنفس المكان تاني...وكاني مكتوب على جبيني..غير قابل للنسيان...اديت ضهري للطريق المرة دي وبصيت للبحر اللي المرة اللي فاتت اديته ضهري...وقعدت اكلمه ويكلمني بموجه اللي انا بعشقه...خرج مني الكلام ده...اللي معجبنيش قوي ..لكن كنت حاسّه قوي..واهم حاجة سواء الكلام وحش او حلو..انه طلع وخلاص..دي علامة صحية..واني انبسطت قوي في السفرية دي..دي برضه علامة صحية

------------------

فارس زمان
-------------------------
من زمن كنا هنا
من شهور
من ساعات
لأ من ثواني
وكوني كان مبدووور زهور
والسكات
عازف اغاني
----
نفس المكان
والبحر كان قدامي برضه
يومها داب قلبي حنان
وفضلت مستني في ردّه
ولما شوقه ليّا بان
انكتب في جبيني وعده
قلتله.. انه حبيبي
واني عمري ما احب بعده
---
واديني جيت
وفيت وعودي
قلتي يا ريت
نطيت سدودي
وبنينا بيت
وانتي شهودي
وفي يوم صحيت
---
مالقيتش عودي
ولا صوابعي بيعزفوا
ولقيت قيودي
وايديا دول اتكتفوا
اديني جيت...
وفيت وعودي
وفين وعودك
ليه اختفوا؟!
---
نفس المكان
وانتي مش جنبي
فارس زمان
ونبلي ذنبي
هرب الحصان
بعد ما طار بي
نط في بحور
بلون عيونك
وفات مهور
كتير بلونك
رسمالي ذكرى
... وابتسام
وقلبي ناسي ...لا ملام
لا أنتي اهلي ..

ولا انتي ناسي
ولا انتي

......

..........
خلص الكلاااااااام
-----------------------

M.H.R