Sunday, March 11, 2007

الصحبجية...حتة من قلبي



الصحبجية امتى؟

في يوم من الايام من حوالي اربع سنين..كنت في سكشن..واتعرفت على واحد اسمه محمد اسماعيل
انسان هاديء الطباع وترتاح لما تتكلم معاه..وعلى غير عادتي قعدت اتكلم معاه كتير قوي...قوي لدرجة حسستني بالذنب لما روحت...انا عارف اني رغاي ورغاي قوي كمان...لكن مش مع حد اول مرة اشوفه...وسبحان الله يوم عن يوم اكتشفت انا ليه كنت برغي معاه كده...البني ادم ده لازم يتصاحب فعلا...فيه كل صفات الصديق الوفي المخلص والصفات اللي بانتلي مع السنين والمواقف..وانا بقول الكلام ده براحتي لانه معندوش بلوج ومش هيقرا الكلام ده عشان كده قلته براحتي
بعد ايام من معرفتي بيه..اكتشفت انه بيلعب جيتار وهو اكتشف اني بكتب كلام...يوم كمان..اكتشفت انه عنده فرقة بتعزف غربي...ويومين كمان وقالي انه نفسه يعمل حاجة شرقي...ضحكت وقلتله الكلام موجود..يا مين يلحن..واديتله كلام كنت كاتبه قبلها بيوم

من هنا بدات الصحبجية...انا اكتب وميشو(محمد اسماعيل) يلحن...ماكنتش لسة الصورة واضحة ولا كان في فرقة من اصله....وفي خلال التلات سنين دول...فضل يدور على اعضاء الفرقة دي..وزي ما يكون مكتوب لنا نعمل الفريق ده...جوه كليتنا لقينا مواهب مذهلة وبرة الكلية كمان....الحاجة الوحيدة اللي جمعتنا في رايي هي الحب....احلى حاجة اننا كلنا اصحاب ..حتى اللي انضموا جديد..ماخدوش وقت كتير لحد ما بقوا اصحابنا......من هنا سمينا نفسنا الصحبجية....كل اللي جمعنا اننا جوانا طاقة..احساس وافكار وحاجات كتير نفسنا نطلعها...ولما جت الفرصة...جينا عشان نحاول اهو


اول حفلة كانت في حديقة الازهر 21/9/2006 واليوم ده اتحفر في ذاكرتنا كلنا..اخيرا بعد كل الصبر والانتظار ده... شايف قدامي كلامي بيتغنى والناس مبسوطه بيه..كل واحد فينا حس الاحساس ده..اللي كتب واللي الف واللي تعب عشان يجهز للحفلة ولدعايتها...وبرضه كل اللي كان مجمعنا كلنا هي حاجة واحدة...اننا حاسين ببعض قوي..وبنحب بعض قوي..احلى حاجة في الكون انك تعمل حاجة انت بتحبها ومع ناس بتحبها....اجواء الصحبجية دي انا فعلا كنت مفتقدها وسط رتابة وملل ورزتين حياتنا دي..انا ميشو مرة قالي اني اليوم ده تقريبا هو اليوم الوحيد اللي كنت بضحك في من قلبي...مش ضحكة مصطنعة مخبية وراها بلاوي..ودي فعلا حقيقة..كل واحد يومها كان حاسس انه يوم فرحه


والنهارده حلمنا حاسه بيكبر قدام عينينا...عددنا زاد...والصحبة كبرت....وافكارنا نضجت...ومستوانا اتقدم...وزي ما احنا مقتنعين قوي باللي بنعمله نفسنا تكونوا معانا يومها ونفسي اللي هيجمعنا يومها برضه يبقى حاجة واحدة بس
الحب...ساعتها بقى يبقى كل امنياتي اتحققت في يوم واحد

في انتظار رؤيتكم يومها ...الصحبجية هتغني في ساقية الصاوي يوم الثلاثاء القادم 13/3/2007 الساعة 8 مساء



الصحبجية ازاي؟


مزيكتنا جديدة..مينفعش تصنفها...نابعة من احساسنا بالحالة والكلام...يعني في رايي الشخصي انك هتلاقي موسيقى شرقية لما نتكلم من صعيد مصر...وغربية لما تلاقينا مهاجرين بكلامنا..وكلاسيكية لما نوصف حالات الحب والمشاعر...مينفعش تصنف موسيقتنا...وانا اصلا بكره التصنيف لانه عبارة عن سجن بتسجن نفسك جواه

معظم الاغاني من تاليفي...وفي اغاني من تاليف محمد رؤوف صاحب بلوج كلمة..واغنية الفها الصديق محمد ابو الصالحين..افكارنا متنوعة...في منها اللي بيقول احساس وفي اللي بيناقش قضية وفي اللي مجرد حالة..وانا اخترتلكم بعض اجزاء منها عشان تاخدوا عنها فكرة...وطبعا حقوق الملكية الفكرية محفوظة للمؤلفين وموثقة في الشهر العقاري كمان


طبعا دي مقتطفات بس من الاغاني ومش لحد اخرها وده عشان مطولش عليكم اكتر من كده


العجوز

ذقنه بيضا..ولونه اسمر
شوفته ..قلبي حنّ ليه
ضحكه فوق الخد سكر
والحنان ساكن عينيه

سألت نفسي ..ازاي أكون
ارتحت ليه وانا معرفوش
يمكن عشان..طيبة العيون
ولا الملامح..والرموش
لوحة للقلب الحنون
مش ناقصها غير رتوش
****************
محمد حامد
M.H.R


قاعد حزين
قاعد حزين في الفجر..والليل سكون
نزلت سنين العمر .. دمع العيون

وليه يا ليل؟..في القلب يأس
لا عاد غنا..ولا حتى رقص
حضنني ليلي..وقاللي بس

بكرة تشوفها بأحلى حال
ألفين سؤال
بيقولو ليه؟!!
..في بلدنا حال
من اليأس بيه
الليل ده طال
دمعي مداريه
***********
محمد حامد
M.H.R



فرصتك
مرّة واحدة بتيجي هي
وتعيد كتابة قصتك
ممكن تخلي الصعب ميه
وتعيد لوشك بسمتك
مرّة واحدة يا ريتها ميّة
والأسم هي.. فرصتك
*****************

محمد حامد
M.H.R


حبة حبة
حبّه حبّه .. كترنا حبّه
وكل مدى.. نزيد محبة
املنا جنة.. لعيوننا غنّى
الكل واحد..نفسه في محّبة


وغني يابني ..وعلّي صوتك
إياك كلامك..يكون سكوتك

وواحدة واحدة..وبالهداوة
هنبقى قوة ..تكسر تابوتك

******************
محمد رؤوف



بحر ازرق

يا بحر أزرق ...موجة حنيني..موجة حناني
يا بحر أزرق ......لون عيون الأولاني

قلّب يا بحر..الذكريات
وروح وهات..أجمل اماني
وارجع بقلبي للي فات
أيام صبايا الأولاني
أيام صبا والعيون ..كانت لسان

أيام صبا .. والقلب كان لساه جبان
*************

محمد حامد
M.H.R


اول ليل
كان لما يجي الليل
نغنّي ليلنا بطوله
وده أصله أول ليل
مالقاش كلام أقوله

الليلة قلبي وحيد
وانت عينيك وحشاني
صوتي كأنه بعيد
صوتك في وجداني

معقول بغنّي لوحدي
وانا عيني مش في عينيك
ده ماكانش يطلع صوتي

إلا وايدي في ايديك
**********
محمد حامد
M.H.R

كانه امبارح
كنت نزلتها في تدوينة على هذا الرابط
هتلاقوها تاني تدوينة في هذه الصفحة بعنوان كانه امبارح
ومن افكارنا الجديدة موضوع الالبوم اللي كلمتكم عنه المرة اللي فاتت
concept album
فكرته بتدور عن مصريتنا اللي ادفنت جوانا وتاهت وسط التغيير...عايشين عيشة مش بتاعتنا..ولابسين لبس مش بتاعنا وبنسمع مزيكا مش بتاعتنا وثقافة دخيلة علينا...لكن لو حصل موقف اثار فيك مصريتك اللي عليها التراب دي...هتصحى تاني جواك والغبار اللي عليها ده هيتناثر...وانا عرضت في الالبوم وجهة نظر المؤيد للتغيير والمعارض ليه...الالبوم مكون من اربع اغاني..اخترتلكم منه جزء من غنوة واحدة وهي الثانية في الترتيب وعنوانها هو نفس عنوان الالبوم واتمنى يعجبكم لما تنورونا في الحفلة ان شاء الله


البوم الدوار
الدوار

بيقولوا علينا اتغيرنا
والتوهة خدتنا في مية مشوار
طب بس قولولي ايه مصبرنا
ومعيشنا لو كنا في نار
انا اللي هاقولك يا اخينا
عن ارض عليها امانينا
شوارعها بتشدي باغانينا
ودي بينا عمار
نفس الدوار
نفس الانسان
احلامي ..وجبة وقفطان
******************
محمد حامد
M.H.R



الصحبجية مين؟



Ahmed Anwar ......................vocal

mohamed ismaiel ................lead guitar&ouD

mohamed emad ....................violin

mahmoud gamal ...................rhythm guitars

mohamed el-badawey ............Bass guitar

omar yasser ..........................drums

Ahmed atwa..........................darabuka & duff

lyrics:

Mohamed hamed

Mohamed raouf

Mohamed abu el-salheN

composer:

mohamed ismaeil

ومينفعش انسى العضو الجديد عمرو الزناتي عازف البركشن والصوت الملائكي ابتهال اللي هتشاركنا في غناء عدد من الاغاني

واحب اقولكم كمان عن صحبجية من نوع تاني..الناس اللي بكتشف قبل كل حفلة انهم اعضاء معانا في الفريق من غير ما يكونوا مشاركين بحاجة مادية...الناس اللي بيشاركونا معنويا وبروحهم وتشجيعهم...واخص بالذكر في عالم التدوين

محمد

مصر هي امي

بجد يا محمد بشكرك قوي على مجهودك اللي بذلته معايا واللي نابع برضه من انك انسان جميل وكل اللي جمعنا سوا هو الحب...ربنا يديم المحبة دي وبشكرك للمرة التانية على اعلانك عن الحفلة في اللقاء وعلى اعلانك المكتوب في مدونتك...لما انت تكتب عني يبقى كاني مصر كتبت عني لانك بتحبها كل الحب ده زيي ومدونتك تحمل اسمها....شكرا يا محمد يا صحبجي..ما انت كده خلاص من الصحبجية..اللي يعمل معانا كده لمجرد المحبة يبقى من الصحبجية..واشوفك يوم الحفلة ان شاء الله

وينكي
حاجة صغنونة كده

بشكرك قوي يا وينكي على اعلانك عن حفلتنا في مدونتك....وعلى انك جاية رغم صعوبة اليوم ده بالنسبة لك...بجد من قلبي شكرا


وبشكر كل المدونين وغير المدونين اللي اهتموا وساعدونا في الحفلة دي او الحفلة اللي فاتت..وفي انتظار انضمام الكل معانا في عالم الصحبجية....مستنيين الكل يبقى معانا...ونغني كلنا من قلبنا في اليوم ده


الصحبجية في صور













الصحبجية فين؟

الصحبجية هتغني يوم الثلاثاء القادم ده 13/3 في ساقية عبد المنعم الصاوي بالزمالك الساعة 8 مساءا

For Further info please contact us:
E-mail:
El-So7bageyya@hotmail.com or visit
www.culturewheel.com

THE BAND FLYER IN THE PREVIOUS POST



34 Comments:

Blogger مصر هى أمى said...

محمد حامد

ايه الكلام الجميل اللى انت ناشره عنى ده كده هتخلينى اخد قلم فى نفسى

يا جميل والله انا حبيتك جدا وحبيت المدونيين كلهم يمكن انا بشجعك علشان فكرتنى بنفسى انى كان عندى موهبة وهيا التصوير لكن للاسف معرفتش انميها واستغلها لكن حسيت انك صورة منى مع اختلاف انك قدرت قيمة الموهبة عندك وبتحاول تستغلها ودى حاجة كويسة فيك
بالتوفيق ان شاء الله ومتخفش مش هنعمل اقتراح انجى ونجيب طماطم معانا علشان لو معجبتناش هنحدفك بيها ان شاء الله الحفلة هتكون جميلة

انا اول واحد يعلق عندك ممكن اخد تذكرة ببلاش


على فكرة طارق واحد من الناس عامل اعلان عن حفلتك الناس اللى بتحبك كتير علشان انت تستاهل

9:17 AM  
Blogger The Alien said...

بما إني بحب أشجع الناس الجديدة
وطبعا تشريفي للحفلة هيديكوا دفعة عظيمة
فأنا قررت أحضر
بس عندي طلب
لو ممكن يعني تذكرة بلوشي أو تظبطني ف الدخول أكون شاكر

هتكون حفلة جميلة
عشان الطاقة والحماس اللي عندكوا
أشوفك التلات
تحياتي

9:52 AM  
Blogger Maat said...

da eh el de3aya el gamda de :D

khalas... se3ebto 3alaya w hafakar agy :D

Good luck you guys :)))

12:56 PM  
Blogger nadine said...

بصراحة انا كنت اول مرة اسمع عنكم
و سمرا كانت قالتلى على الحفلة يوم التلات

بس بعد البوست ده
حسيت قد ايه انتوا فريق قوى
قوى بحبكم لبعض

مش قادرة اقولك قد اييييه انا اتحمست ليكم
و رغم انه صعب جدا انى احضر الحفلة اللى جاية
بس هعمل كل جهدى عشان اجى و اشوفكم
و اكيد هحاول اتابعكم فى حفلات جاية

و بجد مبسوطة بيكم
تحياتى

2:01 PM  
Blogger safa7_karmooz said...

ان شاء الله يا جميل الحفلة تنجح ..

ويبقى يوم جامد ان شاء الله

وهحاول ااجى يومها برضه ..:)

2:46 PM  
Blogger ياسمين said...

معاك يا محمد

كلنا معاك

3:32 PM  
Blogger وشوشني said...

ان شاء الله يا محمد انتوا اكيد هتنجحوا لإن ناجحكوا من وراه تعب وان شاء الله احنا كلنا جمبكوا وان عن نفسي معاكوا كلكوا

5:01 PM  
Blogger مادو said...

ربنا معاكم يا محمد و ان شاء الله هتنجحوا و تكسروا الدنيا

5:50 PM  
Blogger عبوووووووود said...

مش هاقدر أقولك حاجة غير ربنا يوفقكوا
وكفاية عليكوا الحب اللي بينكوا
وكفاية كمان حب الناس ليكوا
إن شاء الله الحفلة تكون رائعة
وعلى فكرة أنا ما قريتش كلمات الأغاني
عارف ليه
لأني مستني أسمعها منكم يوم الحفلة بإذن الله
أشوفك في الساقية

7:47 PM  
Blogger hebaz said...

شكلى كدا مش حلاقى تذاكر يوم الحفلة ربنا يستر
الفانز بتوعك من البلوجز ماشاء الله كتير :)
أيه نظام نجماية نسيتها خلاص؟

8:52 PM  
Anonymous واحد من الناس::طارق:: said...

شكلك كدة هاتعمل الحفلة على فترتين مسائية ومسائية اوى عشان تستوعب العدد اللى جاى
ان شاء الله حفلة ناجحة وخطوة لقدام

2:16 AM  
Blogger frozen love said...

مصر هي امي:

والله يا محمد دي اقل حاجة ممكن تتقال عنك..بجد اقل حاجة


قلتلي بقى...بس ده كدع خلاني اتاكد انك انسان جميل فعلا يا محمد..جديد موضوع التصوير ده..طب لما اشوفك عايز اتكلم معاك..ليه مترجعش الموهبة دي تاني؟


اه بلاش طماطم..ولو اني مش انا اللي هضرب بيها..لكن بلاش احنا عايزين تشجيع بس
lol
ممكن تخفيض لكن تذكرة ببلاش موعدكش
lol
فيه الخير والله طارق ماكنتش اعرف هروح اشوف حالا اهو
ربنا يخليكم ليا يا رب كلكم
اشوفك هناك بقى




the alien:

حضرتك جاي بنفسك..لا لا ده كتير
lol

هو مفيش بلوشي..بس ممكن تاخد فلوسك لو معجبكش
loool
اشوفك هناك يا صاحبي


maat:

enty htnwrena bgd..l2 l2 da kter 3lena...lol
tb mtnseesh tgeeb 20 le tbr3at 3shan 3ayzen y3algony ana we 3twa we medo....lol



nidine:

ده احلى تعليق قريته لانه اول تعليق ليكي ورغم كده حسيت قد ايه انه من قلبك..حاولي تيجي عشان انا كمان اتحمست اني اشوفك

هتنورينا في كل وقت
تحياتي


safa7 karmoz:

الله يخليك يا باشا كويس انك علقت عشان اعرف مدونتك..انا عارف ظروفك..بس هستناك برضه ان شاء الله


ياسمين:

والله يا ياسمين متتصوريش انا فرحت قد ايه لما قريت مدونتك ودعوتك للحفلة...بجد فعلا كلكم معايااا...انا فعلا فرحان...اصل مفيش اي حاجة تخليكم تعملوا كده غير اننا بقينا كلنا اصحاب واهل بفضل فكرتك الجميلة دي

اشوفك هناك يا جميل
هتنوريني

2:32 AM  
Blogger frozen love said...

وشوشني:

في انتظارك..وانا رايح على مدونتك بعد ما ارد على التعليقات

قد ايه سعيد بتعليقك


مادو:

كويس انك برضه جيت عشان اوصلك..مستنيك يومها..وانا برضه ان شاء الله معاك زي ما اتفقنا

تحياتي



عبووود:

يا سلام عليك هو ده الكلام..ان شاء الله تعجبك يومها..وتنضم لفريق الصحبجية الجميل ده...بتكلم عن الصحبجية دول..مش اللي بيغنوا بس

اهلا بيك

2:35 AM  
Blogger frozen love said...

hebaz:

انتي قولي يا رب بس..والتيكت عندي انا
lol

هتصرف ساعتها بس يسمع من بقك ربنا

بجد مجيتك عندي مخلياني مبسوط قوي يا هبة


طارق..واحد من الناس:

انت بقى عايز بوست لوحدك والله

مش عارف اشكرك ازاي على تنويهك عن الحفلة في مدونتك
لازم اشوفك يومها ونتكلم كتير

بجد شكرا
وبجد نفسي اشوفك

2:37 AM  
Blogger محمد ياسر said...

ان شاء الله هاجى وتكون حفلة جامدة وفرقتكو يبقى ليها جمهور كبير والبوست شجعنى اكتر ليكو و كلامك جميل

بس لو وحشة هاخد منك الفلوس

كنت سعيد اوى انى قابلتك فى اللقاء

تحياتى يا جميل

4:22 AM  
Blogger hurricane_x said...

This comment has been removed by the author.

1:28 PM  
Blogger hurricane_x said...

hope u rock the stage like u did last time :)
c u all there 2ensha2 Allah

1:29 PM  
Blogger يا مراكبي said...

أنا سعيد جدا إني أخيرا بقيت أعرف حد من فرقة موسيقية .. ده إذا إعتبرتوني صديق .. ما حدش عارف هتفتكروني بعد الشهرة وألا لأ

أصل أنا كنت مزيكاتي قديم .. بس فاشل

ياترى ممكن الفرقة الكريمة دي تقبل إنها تحيي حفلة خاصة لم آجي مصر في الصيف؟

2:16 PM  
Blogger Memo said...

ادي خمستاشر جنيه طاروه
لما نشوف اخرتها
بس و الله لو الحفله طلعت اي كلام لافضحكوووو
تحياتشي

3:56 PM  
Blogger mano said...

اتمنى لك التوفيق بجد يا محمد
و حقيقى انت موهوب
و ان شاء الله بالنجاح

8:51 PM  
Blogger tamer said...

ازيك محمد
اخبارك اية

انا اسف جداا مش هقدر احضر الحفلة كان نفسى اجى والله بس ظروف الشغل

ربنا معاك ويوفقك

تحياتى

9:21 PM  
Blogger توتة توتة said...

جايين كلنا

10:45 PM  
Blogger micheal said...

و الله أنت شوفت الواحد أكتر للحفله و باذن الله حعما ما في وسعي من أجل الحضور
تحياتي لك و تمنياتي بالتوفيق ليكوا كلكوا

11:40 PM  
Blogger hebaz said...

حامد
الحفلة كانت حلوة بجد
الكلمات كانت بجد رائعة و الموسيقى مختلفة عن ما أعتادناة مع الكلمات العربية
أنا عارفة أن هندسة الصوت مساعدتش للأسف بس أديك شفت الزحمة و حب الناس و الأصدقاء و الجو المبهج الى كلة حب
صحيح كل واحد بطريقتة بس أكيد كان رائع و جميل
شكرا أنك شجعتنى على الحضور و بجد أنت تستاهل كل حاجة حلوة على اٌد كلماتك و صدقها :)

و متنساش نجماية يا فنان :)

11:51 PM  
Blogger مصر هى أمى said...

حامد
مقدرتش استنى لغاية الصبح
الحفلة جميلة جدا طبعا هندسة الصوت مش كويسة لكن انتوا معذوريين كفاية انكوا عرفتوا تدخلوا الابتسامة فى قلوبنا والله اتوا رجعتونى بتاع عشرين سنة لورا
كلماتك حلوة اوى عايزين المرة اللى جاية تظبطوا الصوت شوية
صدقنى انت وكلماتك كنتوا احلى حاجة بالتوفيق دايما ان شاء الله

12:18 AM  
Blogger micheal said...

لظروف خارجه عن ارادتي لم أتمكن من الحضور...معلش يا محمد تتعوض باذن الله...أصل حرارتي وصلت 39 النهارده و رحت للدكتور و منزلتش في اي حته
أتمني لك التوفيق لا واضح أنها كانت حفله كويسه من خلال قرائتي لتعليق محمد عادل
تحياتي لك

2:25 AM  
Blogger raspoutine said...

محمد
انا كان نفسى اكون معاكو النهارده بس انا اتطمنت من استاذ حسنى ومحمد حسام على الحفله وقالولى تمام
معلش تتعوض ان شاء الله فى الحفلات الجايه
وكلامك انا قريته وعجبنى اوى
اتمنالك الاستمرار والتوفيق

ايمن فاروق

2:33 AM  
Blogger Elsede3' said...

saba7 elfol gamee3an :)
nargo en el7afla tekoon 3agabetko

belnesba lel soot ba2a, fa mawdoo3 el feed back elly 7asal da kan 7'areg 3an edeena we edeen 7atta mohandes elsoot

ya rab yekoon bas el7agat 3agabetkom
we saba7 elfol tany

4:15 AM  
Blogger IRC President said...

kan feeh jazz we blues bardo shewaya :P

Good effort guys, way to go.

2:29 PM  
Blogger Elsede3' said...

3eeb 3aleek
kan feeh kol 7aga :)
hope u liked it

4:37 PM  
Blogger وشوشني said...

This comment has been removed by the author.

7:11 PM  
Blogger frozen love said...

صحبة المدونيين

حبايبي واصحابي واجدع ناس شوفتها في حياتي

ماكانش ينفع ارد عليكم بتعليق بس...البوست اللي بعد ده في كل اللي نفسي اقوله ليكم


بس كنت عايز اشكر هنا هبارز ووشوشني ومصر هي امي وطارق

واقولكم ربنا يخليكم ومبسوك اني الكلام عجبكم..وموضوع هندسة الصوت ده بدوي عازف الباز رد عليه..ومع ذلك حطيناه بشدة في جدول اعمالنا..يا هنغير القاعة المرة الجاية يا اما نشوف حل مع مهندس الصوت

تحياتي ليكم كلكم وارجو انكم تقروا البوست اللي بعد ده

4:10 AM  
Blogger وشوشني said...

This comment has been removed by the author.

4:14 PM  
Blogger وشوشني said...

محمد فعلا انا لما سمعتكوا اتغيرت الفكره خالص اللي كنت فاكراها الحقيقه انا لما قريت الكلمات طبعا الكلمات عجبتني بس كنت حاسه ان هي مش ممكن تتلحن بشكل حلو ومن الأسلوب اللي بحبه بس فعلا اللي لحن الأغاني واللي مش فاكره اسمه فعلا استاذ كبييييييير اوي بس انتوا كده بقيتوا من اكتر الفرق اللي بحبها وانا فعدت ادور عليك كتير بع الحفله بس مالقتكش عشلن كنت عايزه اسألك شويه حاجات عن الصحبجيه بس لقيت كل حاجه هنا

4:20 PM  

Post a Comment

<< Home