Monday, May 28, 2007

الحرّ.. حرّ

اهداء الى كل من دافع يوما عن حريّة المحروسة
-------------------------
لا عندي قوّه ولا ضامنه عمر مديد
وده قالها هو من مية سنة ويزيد
العبد ..عبد ولو يعيش فبراح
والحرّ.. حر ولو يموت فحديد
-----
M.H.R

Wednesday, May 23, 2007

كانت اميرة (مرثية)....وايه كمان يا بلد


الخبر
موت تلميذة بضربة شمس بعد إجبارها على الوقوف لساعات لاستقبال الوزير 5/15/2007 3:10:00
القاهرة - لم تعرف أميرة 11 عاما، ما إذا كان الدكتور يسري الجمل وزير التربية والتعليم، يستحق التشريف أو الترحيب أم لا يستحق، لم تقع الفتاة الصغيرة في غرامه، حتي تخرج مهللة مرحبة بزيارته (التاريخية) لمحافظة قنا، ومدرستها المتواضعة في قرية كلاحين بمركز قفط، لم تعرف ما إذا كانت زيارة هذا الوزير مهمة أم عادية، ستؤثر في مسيرة التعليم وتنهض به أم ستمر بلا جديد مثل غيرها.
كل ما عرفته الفتاة الصغيرة، أنهم ساقوها مع زميلاتها في مدرسة نجع معين الابتدائية للوقوف في طوابير الترحيب والتشريف بصاحب المعالي، مثلما يساق عساكر الأمن المركزي، والمخبرون للعب دور المهللين لأي مسؤول.
وقفت أميرة في طابور التشريفة، لا حائل بينها وبين شمس الصعيد الحارقة، طالت وقفتها، وتصببت عرقا من كل مسام جسدها الصغير، وبينما مسؤولو التربية والتعليم مسرورون من نجاحهم في (تظبيط) الوزير، والوزير بدوره سعيد بزفة (النفاق) التي استقبلته، والابتسامات المصطنعة والكلمات المأثورة التي ترفعه إلي درجات الفاتحين والمصلحين، كانت أميرة تسقط مغشيا عليها، بعد أن أجهزت عليها ضربة شمس، وسلمت روحها البريئة الطاهرة إلي السماء.
خرجت أميرة صباح الاثنين 7 مايو الجاري، والابتسامة تعلو وجهها كعادتها، وعادت في آخر النهار جثة هامدة، فارقت حضن أمها في الصباح علي أمل أن تعود إليه بعد نهاية اليوم الدراسي، لكن الأم المكلومة تقول: فارقت ابنتي حضني إلي الأبد.. قتلها يسري الجمل ورجاله.. قتلوها.
الأب المجروح محمد عطا أحمد 41 سنة، ينفي أن تكون ابنته عانت في أي وقت من مرض، ويقول: كانت البكرية علي 3 أشقاء، لكنهم أوقفوها لساعات طويلة في الشمس الحارقة.. حتي ضاعت أميرة.
عمها ناصر عطا يروي تفاصيل المأساة: سقطت أميرة أثناء وقوفها في تشريفة الوزير علي الشارع المواجه للمدرسة، حملتها وأسرعت إلي الوحدة الصحية، وفشلنا طوال 4 ساعات في إفاقتها، أسرعنا بها إلي مستشفي قفط المركزي، فوجئنا بعدم وجود طبيب مختص، وفي طريقنا إلي مستشفي حميات قنا كانت روحها قد صعدت إلي السماء، حسبما ذكرت جريدة المصري اليوم.
أنهي يسري الجمل زيارته إلي قنا، وعاد إلي مكتبه في القاهرة، بينما كانت أسرة أميرة تصارع أحزانها، خصوصا حين جاءهم رد الفعل الرسمي الوحيد من إدارة المدرسة، خطاب يقول: رجاء إفادتنا بشهادة وفاة الطالبة أميرة محمد عطا أحمد حتي يتسني لنا رفع
اسمها من سجلات القيد بالمدرسة.



الخبر اللي فات ده منقول..وفي الحقيقة مش قادر اقول اي كلام تاني غير اللي الكلام اللي خرج مني لما قريته...حاسس اني المفروض اعمل حاجة..ومش عارف هي ايه...امرّ احساس ممكن تحسه هو مجرد تخيلك لطفل بيموت....البكا المرة دي ممنوع يا حضرات..والعزاء في رايي ممنوع برضه لحد ما!!!...انا حتى مش عارف لحد امتى....ربنا يرحمك يا اميرة ويصبر اهلك ويصبرنااااا


-----------------------
مـــــرثيّة..كانت أميرة
---------------------
الطول يدوبك نص متر
يمكن صحيح مشوفتهاش
بس في عيونها انا شفت قهر
وعمر راح كده ببلاش
وقدموه لوزيرنا مهر!!
مات اللي مااااات
ووزيرنا عاش

*************
مهوركوا زائفة...يا قلوب حديد
والشمس خايفة ..فوق الصعيد
هاين عليها تنطفى
هاين عليها تختفي
ولا تاسى عالقلب الوليد


اه ه ه
مهوركوا زائفة...يا قلوب حديد
والشمس خايفة ..فوق الصعيد
*****************
اميرة هي..وكات اميرة
الكف نونو...وعيون صغيرة
يدوب بتحلم بضفيرة جاية
الموت يا عيني..فك الضفيرة
عز النهار...بقى مغربية
اميرة هي...وراحت صغيرة
***************
عشر سنين
عشر سنين!!
ولا ازيد...
ولا معرفش الحساب
عشر سنين
وبقيتي يا بنتي سراب
--
وحياة عينيكي اللي باتوا مغمضين
وحياة ضميرهم اللي غاب
لتعودي من وسط الانين
ويكون صريخ اهلك عذاب
وصرخة امل للغفلانين
وحياة عينيكي اللي باتوا مغمضين
لا هنسى يوم كات مين اميرة
ولا هنسى يوم عد السنين
************
M.H.R

Friday, May 11, 2007

عدناااااااااا




كنت مشغول...لا كنت مطحون...كنت مخنوق كمان...جايز كنت بعيد حساباتي في حاجات كتير....ممكن برضه يكون كانت نفسي مسدودة عن كتابة اي حاجة....وساعات كنت بحس اني جرعة الكابة في كلامي زادت عن حدها لدرجة اني لازم استنى شوية واخد فترة ابعد فيها عن البلوج....المهم اديني جيت....وعلى فكرة انا كنت بقرا بلوجاتكم من وقت للتاني...كان في حاجات فعلا روعة..بس اعذروني اني مكنتش بعلق عليها..بجد يا جماعة انا مكنتش انا خالص


انا اسف كمان قوي على الناس اللي انا قلقتها عليّا وبشكركم قوي كلكم على سؤالكم المستمر عليا سواء اللي كلموني او هنا عالبلوج...وايه كمان!!..مش عارف بقى بس انا رجعت اهو تاني

-------------------

هاتسيبي فيه

-----------------

سبت فيكي وسيبتي فيّا
الف بصّة مدارية
سبت ضحكة وابتسام
مية طريقة للسلام
وسيبتي فيّا كتير كلام
حتى سيبتي اسامي ليّا

سبت فيكي وسيبتي فيّا


تفتكري راح هاتسيبي فيه؟!!
والقى نفسي حاجة فيه
بصّتي من لون عينيه
نبرتي في صوت ضحكة ليه
ولا كل حاجة فيّا

سبت فيكي وسيبتي فيّا


عارفة
عارفة اني ممكن اوصفه
ويوم ما اشوفه هاعرفه
اصله صاحب كل يوم
فمرايتي شايفه والهدوم
مش هيبقى غريب عليّا

سبت فيكي
وسيبتي فيااا

----------

M.H.R