Wednesday, June 06, 2007

عقرب الثواني...تنهيدة


---------------------

عقرب الثواني

-----------------

زمان

واحنا لسة مانفهمش
في زواق الكلام
واحنا لسة مانعرفش ..
غير معنى السلام
كنت باسأل ..أسئلة
كنت عامل مشكلة
ليه الناس بتحلم...
أحلام متأجلة
وازاي في قلوب حزينة..
ووشوشها ممثلة
ليه عقرب الثواني....
سابق الدقائق
وليه الكل فاني....
وازاي مفيش حقائق
كان قلبي فيه اغاني..
وكان البال ده رايق
-----

و كل سؤال حكاية
وكل حكاية جرح
وعقرب الثواني
نازل في الساعة دبح
عمّال ياكل زماني
ويخطف من قلبي فرح
---

وتقل ايام حياتي
وتقل الاسئلة
وماضيّي وذكرياتي
مش هما المشكلة
انا خايف من اللّي آتي
وعينيا مغفلّة
---

او يمكن اللي فات
يكون المعضلة!!
وتكون الذكريات
دي اصل المشكلة!!
اهي جت الاستفهامات
اجابة لأسألة
وعقارب الساعات
معايا مكملة
يمكن بقى في سكات
عشان المسالة
بقت هم وآهات
وعمر وبهدلة

---
وعقرب الثواني
لسه سابق رفاقته
مسمومة فيه الاغاني
وسارق من الكل وقته
والسرقة في شرعه عادي
لا هي عيب ولا حرام
سارق مني الساعة دي
وقاتل فيّا الكلام
ولاني ليه معادي
وكل اللي بيننا خصام
راح اسرق منه زمنه
ومفيش ابدا ملام
واسرق حتى تمنه
ووش الابتسام
واسيب فيه السكات
فيعود ليّا الكلام
واسيب فيه اللي فات
فتموووووت فيّا الالام
-------

M.H.R