Tuesday, October 31, 2006

جيفارا...ارخص من المحلات


اللي يعرفني كويس..يعرف قد ايه جيفارا مضايقني..طبعا مش تشي جيفارا نفسه..المناضل اللي انا شخصيا بحترمه وكتير مننا بيحترموه رغم اختلافنا معاه في الأشياء اللي وصلتنا لاحتضان مبادىء الحرية ومبادىء تانية كتير..وساعات اختلافنا في الاسلوب..لكن في النهاية يظل احترامنا ليه لا يتزحزح كلما قرانا عنه او شوفنا معلومة هنا او اخرى هناك..اللي مضايقني بقى هو انتشاره بين طائفة الشباب بالصورة الرهيبة دى..ما بين صوره على العربيات او حتى الهدوم والميداليات وعلى الكمبيوتر ..وساعات بقى الشباب بيعملوا شكله (يعني الذقن والجاكت وكده)..هتقولولي ايه هي المشكلة؟!! لو انت بتحب حد قوي ممكن تقلده او تحتفظ بحاجة تفكرك بيه...المشكلة بقى ان 90% من الشباب دي ميعرفش مين هو جيفارا...ولو يعرفه ميعرفش ايه هي مبادءه ولا كان بيطالب بايه وفين وعشان ايه..الموضوع ده قعد فترة كبيرة مضايقني..لحد ما تعايشت معاه..وفي خلال هذه الفترة بقى في شخصيات تانية تنال هذه الشعبية بين الشباب وبرضه عن جهل...والشخصيات التانية دي مش حاجة بقى خالص..لا مبادىء ولا كلام فاضي...وبرضه قلت يا واد سيبك..لكن عمنا جيفارا هو اللي ماسبنيش بقى..كل يوم او يومين ..الاقي حد مقلده ..او حاطط صورته..فافتكر..اروح حفلة لوسط البلد..يغنوا جيفارا...والناس حافظة الاغنية وبرضه بيقولوا مين هو جيفارا...فافتكر تاني...لحد ما قعدت فترة معقولة في سلام تام من ناحية الموضوع ده....وفي أحد الايام ...كنت مروح من الكلية لحد بيتنا في الهرم..وما كانش في حد معايا ولا حد بيوصلني...فوقفت في ميدان العباسية الساعة الجميلة..وركبت الاوتوبيس المكيف اللي هو مش مكيف ده ولا حاجة عشان اقضي فيه الساعتين الجمال...والدنيا حر..طحن...وواقف لاني مفيش مكان...وكل ده ويدخل الاوتوبيس عيل صغير بيبيع حاجات...وكده المشهد مش ناقصه حاجة غير نشال وتبقى ففيلم عربي من بطولة سواق اتوبيس نقل عام....الطفل ده بقى يبيع ولاعات..ومفكات متسالونيش ليه!!...وجلد حنفيات ومش عايز تعليق برضه لاني ده حوار لوحده...وميداليات..هتسالوني عليها صورة مين..هقولكوا حبيب قلبي (ارنستوا رافايل جيفارا) الشهير بتشي جيفارا..وهنا خرجت مني هذه الكلمات متخيلا ان عمنا جيفارا شخصيا بيتباع في الاتوبيسات مع اختلاف طريقة عرضه للبيع من واحد للتاني ومن واحدة للتانية.......ومعلش طولت عليكم والكلمات دي اهي وطلعت مني في صورة زجل مش قصيدة بالمعنى يعني بس فعلا كنت محتاج اتريق عالموضوع ده

جيفارا


جيفارا ياانسة...جيفارا يا مدام
جيفارا عالميدالية..اتفرج يا سلام

جيفارا للامورة..خدها مني صورة
تلزقها عالفانلة ..او شباك الحمام
جيفارا يا انسة..جيفارا يا مدام

معايا صورة جيفارا..فوق كباية العصير
منها احمر واخضر..ولسة الوان كتير

طب خدها مني حتة...تلزقها عالجاكتة
او فوق المخدة او حتى ملاية السرير


جيفارا يا حلاوة...ده بينفع للزكام
جيفارا يا انسة...جيفارا يا مدام


محدش قال هات...ارخص من المحلات
جيفارا يا استاذ...اللي اندبح ومات
مين ياخد المناضل بتاع الهتافات

بتاع المبادىء.. .وو...وابوك السقا مات


جيفارا للحرارة..ومسكن للالام
جيفارا يا انسة....جيفارا يا مداااام






Sunday, October 29, 2006

كأنه امبارح


(كأنه امبارح)


في ده الملكوت وانا سارح
في لحظة موت كما امبارح

وشجرة توت بعود طارح
بتطرح فينا شيء جارح



وجوه قلوبنا ...بتسيبنا...في جوه بيوت
من الأحزان..وفجأة تفوت
بدون الوان ومن غير صوت
وتتركنا في ده الملكوت

وتنسانا...........

ودمعاية دي فوق الخد بتاااااوح
في ده الملكوت وانا سارح


كما الغرقان في مليون فكرة
في بحر حنان عينيه فاكرة
وكل مكان وفيه ذكرى
وبستناه يعود بكرة

يجي معانا....

وبحر حناني..صار مالح
في ده الملكوت..وانا سارح


ووقت يعدي..ما يعدي
ولا بيجري..ولا يهدي
لا عمره استنى ايه ردي
ولا طلبه فيوم ودي

ومهما يا موج هتتلاوح
بنفس الذكرى راح اااوح


في ده الملكوت
وانا سارح
في لحظة كأنها امبارح















Friday, October 27, 2006

درع حديد

ساعات يكون السكوت..هو علامة الرضا
وساعات يكون في البيوت..وسككنا متسددة
وايام اعيش اموت..واحلامي متهددة
واعيش!!...وخوفي ماليني..والحلم فيا بعيييد
قافل وداني وعيني...وكاني فيها وحيد
فارس..لكين ياعيني..محبوس في درع حديد
من جوه درعي اصرخ..يرد تاني الندا
هو صحيح السكوت.. ينفع علامة الرضا!!
يا صاحب الملكوت...لك حكمة في كل ده

Labels: