لقاء المدونين...البورصة المصرية

يوم هاديء جدا...لقاء معروف مكانه وزمانه لكنه مفاجيء...بجد انا اتفاجئت.....اللقاء ده يا جماعة كان لقاء المدونين الشهري اللي اقترحته علينا الصديقة ياسمين للمرة التانية بس المرة دي كانت فعلا مختلفة...ورغم اني محضرتش الاولى لكن في نهاية اليوم اكتشفت اني المرة دي فعلا كانت مختلفة....اخيرا اكتشفت اني مش لوحدي في هذا العالم....اخيرا لقيت وعرفت ناس ابسط ما يقال عنهم انهم ناس بتحب مصر...وده كفاية عندي...ناس اهتمامتها من اهتماماتي..ارائها من ارائي..ناس كانوا اصدقائي من قبل ما اشوفهم..من خلال مدوناتهم بس..لا مش بس قبل ما اشوفهم..ده من قديم الازل....اللقاء ده انا واثق انه كان مكتوب على جبين كل واحد فينا.....ياسمين حلمت حلم صغير وخطوط لوحته عمالة تترسم يوم عن يوم....والرسامين هما ولاد مصر...ولادها اللي بجد...مش اللي عايشين فيها وخلاص..الحلم احنا شايفينه بيتحقق...والله اعلم هيتوقف بيه المطاف فين..ربما يكون في يوم من الايام زي ما قلتلكم على سبيل التهريج جمعية المدونيين المصريين

مين عالم؟!!!

اليوم بدأ بتجمعنا في قهوة البورصة وده المكان اللي تخيلت في البداية انه غير موفق تماما..لكن بمرور الوقت اكتشفت ان الناس الصح في المكان الصح..ولاد البلد اتجمعوا في الوسط البلد باختصار....الارض اللي قالي عليها استاذ حسني سليمان (اللي افضل مهنة تختارها له مهنة فنان من وسط المهن الكتير اللي قالهالي...صاحب مدونة افنان الفنون) قالي عنها انها من مئات السنين...الارض دي هي اللي كانت لازم يتجمع عليها ناس زي دول....ولاننا اتفقنا كل واحد يكتب انطباعه عن اللقاء حبيت اكتب انا اليوم كان بيمثلي ايه هو والمكان قبل ما اقول انطباعاتي عن الاشخاص اللي حضروا...حضر اللقاء الكثير من المدونين في مختلف المراحل العمرية والمهن والدراسات....كل اللي بيجمعهم..الفكر الواعي وحب مصر وحب الكتابة والثقافة والفن.....هاسرد عليكم كلام عنهم وعن انطباعي عن الشخصيات اللي ذاكرتي هتقدرني افتكرهم

الشخصيات حسب الظهور تقريبا....انا مش بهزر هحاول افتكرهم بترتيب الحضور عشان نبقى على نور من الاول مين مواعيده بايزة ومين كويسة..للعلم يعني انا مواعيدي بايزة بس صادفتت اني وصلت مع الناس اللي في الاول..و الانطباعات اللي هكتبها دي هكتبها بصراحة متناهية زي ما حسيتها..لان الانطباعات الاولى لا تدوم طبعا وربما اكون لسة معرفتهمش كويس..بس قبل ما اقول احب انوه اني حضور استاذ احمد شقير واستاذ حسني سليمان ادى للقاء معنى اخر فعلا...بجد شكرا لحضوركم

ايلاري موريس (مدونة حد فاهم حاجة)...اول الحاضرين جه قبلنا كلنا..مواعيد مهندسين فعلا...انسان مثقف يحترم الراي والراي الاخر...متفتح وحيادي..ومنظم على ما اعتقد وده استشفيته من حبه في ترتيب الحوار بيننا وبين بعض...عجبني نقاشه وعجبني اقتراحه بخصوص المدونين الجداد وتشجيعهم ومعجبنيش اقتراحه بتاع عيد الصداقة..ممكن يوم المدونين...لكن عيد الصداقة ونلبس ابيض واسود..هي فكرة..بس مقابلتش استحسان مني

محمد (مدونة مصر هي امي) ....انسان محترم قوي ومتربي..ولو قلت انه طيب هاقول من هنا لبكرة...وبيحب مصر قوي قوي...ودا كفيل اننا نبقى اصحاب...افكاره متقاربة جدا من افكاري اللي انتم اكيد عارفينها من مدونتي..عنده حضور

بيشوي

alien

وده مش اسم مدونته بس...على حد تعبيره انه مسمي المدونة كده لانه ماكانش لاقي ناس تتواصل معاه....ولما لفى مدوناتنا قرر يجي...واعتقد فعلا انه لقى ما كان يحلم بيه...ورغم اني اختلفت معاه في مناقشاتنا الا انه انسان يقدر

ويحترم حرية البشر عموما...لم نلتقي فكريا ولكننا التقينا بمصريتنا وفطرتنا

ياسمين

مدونة

sky light

منظمة اللقاء وصاحبة الحلم الجميل ده....انسانة اجتماعية جدا...جواها هموم كتير...معرفش ليه حسيت بكده بس الاحساس ده وصلني على نحو ما...طيبة قوي...وجراتها معهودة من مدونتها طبعا..بتحب الناس وبتشجع المدونين والكتاب الجداد..وارائها حاسمة ودي ميزة انك تكون متحضر

احمد شقير
مدونة حكاوي اخر الليل

غني عن التعريف طبعا...ابو المدونين ده...وكان وجوده المفاجيء معانا من غير ما يقولنا حاجة فرحتنا قوي..بجد نورنا في اليوم ده...انسان جميل قوي...وبيقول اللي جواه بكل بساطة..يتسم قليلا بالغموض اللي مفهمتوش لسة من اول قاعدة ونتيجة كلامنا القليل..لكن بجد وجوده في وسطنا كان بيمثل قيمة كبيرة...وتشجيع للشباب امثالي

انجي

سمراء النيل

مدونة اي حاجة بقى

يعني هي محتاجة بوست لوحدها بصراحة..لاني مينفعش نوصف بنات مصر كلهم في كلمتين ...لكن هي اكيد باحساسها العالي عرفت قد ايه انا كنت مبسوط من رؤيتها...وكاننا نعرف بعض من زمن....لقيت سمراء النيل فعلا... هي دي صاحبة البلوج ده فعلا..كانها رسمت كلامها على المدونة في ارض الواقع جوه انسانة رائعة وطيبة....وحط بقى شوية تحابيش الحضور والدم الخفيف والحزن الكتير المستخبي ورا الابتسامة العريضة دي...ومش هتكلم عن الاتنين ليمون والتاكسي طبعا..عشان كل اما افتكر يا انجي بضحك طحن

اسامة

مدونة لسعة دبور

كونه اني يجي من الاسماعيلية عشان يشوفنا دي حاجة على راسنا من فوق فعلا....انسان جميل وطيب وبيحب الناس قوي...وحاسس انه جواه طاقة لسة مستغلهاش كويس...ربنا يوفقه ويوفقنا...متكلمناش كتير قوي...لكن شخصية

ظريفة

الاستاذ حسني سليمان

مدونة افنان الفنون ومدونات تانية

احب اخترله من مهنه الكتير مهنة فنان..الراجل ده يتلخص في تلات كلمات فنان مصري اصيل....كل المدونين فرحوا قوي بوجوده وزي ما هو على حد تعبيره قلنا اننا رجعنا شبابه..انا كمان بقوله وانت كللت اللقاء ده بالنجاح لاننا حسينا اني حلقة الوصل بين الجيلين لسة موجودة متقطعتش

ايمن فاروق

مدونة راسبوتين

محمود صاحبي قاله تنفع ضابط والله وهو بيصورنا..هو فعلا انسان منضبط...حسيت انه كان سعيد باللقاء...وشكله طيب قوي ومتكلمناش كتير قوي برضه

ابراهيم معايا

مدونة انا وانا

احلى حاجة انه جاب نفسه معاه...في الاول حسيته غريب شوية...بعد كده اكتشفت انه دماغه حلوة جدا جدا وطبعا بيحب الشعر وبيكتب قصص وورانا الكتاب اللي نزلّه قصة ودي حاجة تخلينا اصحاب من غير حتى ما اعرفه...الشعر هو اللي بيسحرني...وبعيدا عن الانفصام اللي عنده-بهرج طبعا عشان مدونته بشخصيتين-..هو انسان كويس قوي ويبدو عليه التدين

عمرو احمد

مدونة اريدك انثى

ببساطة شب نضيف..متربي ودماغه حلوة ومبيحبش تامر حسني عشان كده بقينا اصحاب على طول..عشري وجدع جدا مرضيش يكمل القاعدة غير لما اطمن مين هيوصل سمرااء للمترو عشان سمرا جارته...حبيته قوي وحسيت اننا اصحاب من زمان

احمد حداد

مدونة ahmed_h

فنان في التصوير وكل اللي كنت اعرفه عنه حكايته مع مجلة تين ستف لما خدوا منه الصور وقدر يحصل على اعتذار منهم بمساعدة استاذ احمد شقير..ولما قابلته عرفت قد ايه هو ظريف...وطلعنا نعرف احنا الاتنين ناس في كليته..الدنيا صغيرة فعلا

ايهاب

مدونة ايجيلز

Eagles

مكنتش اعرف مدونته قوي لكن بعد معرفتي بيه هكون من ضيوفه الدائمين..لانه فعلا شخصية جميلة ومثقفة ونفسه البلد تبقى احسن من كده...وطريقة كلامه محسساني اني اعرفه قبل كده لكن مش فاكر منين

وظهورخاص جدا جداااااااااااا............صدفة من احلى الصدف...محمد رؤوف صاحبي مدونة كلمة طبعا مش محتاجة تعريف..رغم انه ماكانش يعرف ورايح بالصدفة وده اكبر دليل اني عالم التدوين من غيره مالوش طعم..مستنينك يا عم وحشتناااااا

لسة في كتير تاني...مايكل محسن مدونة مايكليتو...ومدونة كيف تحيي الموتى...وضيوفنا الغير مدونين محمود الباز صديقي الصدوق وتهامي صاحبي انا ورؤوف... في اللي جه معانا بروحه ودول اللي مقدروش يجوا الحصان الاسود ووينكي ومحمد عبد الغفار مثلا

ولسة في كتير بس انا حبيت اتكلم عن دول على سبيل العينة...والعينة بينة كما تعلمون..بجد سعيد بمعرفتكم وسعيد باللقاء وفي انتظار تكراره...للمرة الميّة بقولك انها فكرة موفقة جداجداجدا يا ياسمين

دارت نقاشتنا في كل الموضوعات تقريبا...كل اللي بيدور على الساحة واللي مبيدورش كمان...كلام بجد كان عايزكم كان نفسي كل المدونيين يكونوا معانا في اليوم ده...ودي بعض الصور انا حطيتها زي اللي في مدونة احمد حداد..على اساس معرفش مين لا يفضل ظهوره بالصور

ياسمين سكاي لايت والاستاذ حسني سليمان والمهندس ايلاري

محمد..مصر هي امي...وايهاب ايجلز...وبيشوي ومايكل

اسامة..الدبور


من اليمين تهامي ورؤوف وانا

مراسلكم محمد حامد من لقاء المدونين الشهري الثاني...عقبال الاحتفال بالمئوية ان شاء الله

عيد الحب..والشهيد تامر حسني

كالعادة من ساعة ما عملت المدونة دي..وانا كل اما اجي اهنيكم بمناسبة...يطلعلي حاجة..تمنعني من التهنئة..معرفش ده اسمه..ممكن حظ سيء مثلا...

المرة دي كنت ناوي اكتب تدوينة عن عيد الحب..واشارككم لحظات جميلة سواء لو احتفلتم بيه او محتفلتوش زي معظم الناس اللي مبتعترفش بيه..او فركشوا من فترة بسيطة..ومعرفش ايه حكاية الانفصال والفركشة السنة دي..سواء كانت رسمي ولا مش رسمي..مش موضوعنا

انا نويت احتفل معاكم يعني هاحتفل...وفعلا كتبت درافت لتدوينة عن الفالانتاين...وليه اتعمل..وزاي ممكن نحتفل بيه..حتى لو مش مقتنعين...كنت اقصد يعني اننا نتلكك..وندور على حاجة تفرحنا...وطبعا اول ما افكر في حاجة تفرحني..من البديهي جدا معايا انا بالذات يطلع 100 حاجة تخليني مكتبهاش..وكان القلم حالف عليا ليفضل كئيب كده..المهم...حصل حاجات كتير بدات بامتحان..وانتهت اني النت متعطل واني بكتب دلوقتي الدرافت ده عشان اول ما يتصلح انزل على المدونة

طب هتسالوني طالما التدوينة مش على عيد الحب..تبقى على ايه؟..شوفوا..هي على تامر حسني....انا مش بهرج على فكرة...هي على تامر حسني فعلا..بس مش على الشخص اللي اسمه تامر حسني..هي على ظاهرة لاحظتها مؤخرا...واتاكدت لي عن طريق الخطأ...بس انا قبل ما ابدا الكلام عايز اعمل مجموعة اعتذارات


انا بتاسف اني هاطوّل عليكم شوية في الكلام..لاني عايز احكيلكم حكاية كده..ده غير اني بقالي فترة غايب..فاكيد انا وحشتكم..زي ما انتم واحشني بالضبط

و بتاسف للناس اللي مستنية حاجة ذات قيمة على مدونتي كالعادة..وهيتفاجأوا اني بكتب عن تامر حسني..ودول بقلهم اتقل للاخر وهاتفهم انا ليه استفزيت اني اكتب الموضوع ده

وبتاسف للي بيحب ..هذا التامر "وهذا التامر دي للتقليل"...انا بعتذر لكم..انا ساعات بحبله اغاني..من وقت للتاني كده بتقع في طريقي..زي حضن الغريب مثلا...بس ده مش معناه انه يزيد عندي عن مطرب مبتدا..امكانياته الصوتيه والعقلية كمان محدودة..وممثل سيء ايضا...يعني متزعلوش مني "ده بالنسبة للي بيحبه يعني"...بس ده راي


وكمان عايز اتاسف لكل الشباب اللي انا وصفتهم مفتقدين للقدوة..في تدونة سابقة ليا...
التدوينة اهي

http://m-rashed.blogspot.com/2006_10_01_archive.html

كانت عن جيفارا واللي بيقلد جيفارا..واللي بيلبس لبسه او يحط صورته وهو مش عارفه....انا بعتذر للناس دي يا جماعة..لاني اكتشفت انهم على راسي من فوق...لاني لقيت ما هو اسوا واضل...لقيت اللي بيقلد ويلبس لبس "تامر حسني"...ولقيت اللي بيعيط عشان يحضنه..واللي راحله المحكمة..واللي صممله موقع....انا اسف يا مقلدين جيفارا..انتم الصفوة...ومستقبل مصر الحبيبة

واسف وبلوم نفسي..اني الصدفة والقدر وجهوني اني اروح حفلة الشهيد تامر حسني...عن طريق الصدفة والله...انا انبسطت وضحكت..لاني كان معايا اصحابي..بس اضايقت من اللي شفته

وفيه اعتذار واجب للفنان تامر حسني نفسه....لاني فعلا مش مضايق منه كشخص..انا مضايق من الحدث...اي حد مكانه يلاقي ناس تافهة كده وميستغلش الموقف يبقى غبي...انا اسف يا عم تامر بس أي تريقة في التدوينة دي لاني متغاظ بس من حال الشباااب

واخيرا وليس اخرا...انا اسف على شبابنا اللي وصل لمرحلة من التفاهة..لم يصل لها من قبل..وانا مش بعمم والله...بس على الاقل الاقل...اسف على ال 40000 مثلا اللي كانوا في حفلة تامر يوم عيد الحب


انا خلصت الاعتذارات كده اقدر احكيلكم ملخص الحكاية براحتي...الحكاية بدات في اليوم السابق لعيد الحب...لما قلنا انا واصحابي ..هتعملوا ايه بكرة؟
وقلنا مش عارفين وكانت في اقتراحات اننا نروح حفلة..وسالنا على الحفلات..قالولنا تامر..قعدنا نتريق ونقول "وحشتنا يا تامر"..ودي بكم دي ان شاء الله يا جدعان؟
جنيه 50

ايه..ده انا لو تامر جه يغنيلي في البيت مش هديله 50 جنيه...ده غير انه كمان خنقني بعد حوار القضية..بس ده مش موضوعنا..مش هو ده اصلا اللي ادفع أي حاجة عشان اروح حفلته..او ممكن 10 جند مثلا..وقعدنا نضحك
خلاص يا عم احنا ننزل ونتمشى وخلاص وممكن نبقى نبص بصة
قشطة براحتكم.. انا معاكم يا رجالة

مساء اليوم التالي...تليفون من محمود
انت لسة نايم..قوم يا عم..الشباب جاية و خارجين كلنا..
فل انا ساعة الا توت كده وهابقى عندك

اتجمعنا...ورحنا مدينة نصر...هتعملوا ايه؟..
نبص عالحفلة
نبص على ايه ما حنا قلنا اللي فيها
يا عم نشوف ايه النظام.....لقينا حوار دخلنا بيه ببلاش....وطبعا كلنا قلنا قشطة...حفلة وجت ببلاش ان شاء الله مين جوه..نبص بصة..ولو وحشة هنمشي..امين يا عم؟...آمين

دخلت الحديقة الصينية لقيت ناس قد اللي كانو في حفلة اس او اس 3 مرات مثلا ومعلوماتي بتقول اني الاس او اس حضرها 12000..يعني البشر دي حوالي 40000 مثلا
قشطة..وحشتنا يا تامر...وضحك متواصل..ولكن المفاجاة بقى اني الحفلة كلها كانت على طريقة "وحشتنا يا تمور"
انا عشان طولت قوي هالخص اللي شفته في عدة مشاهد كده

* بنت منهارة وبتعيط بالدموع وبتترجى البودي جارد اللي جنب تامر على المسرح انها تطلع تحضنه...ولما تكرم تمور وشاورلها انهارت بالدموع في حضنه

* بنت اخرى نفس الحوار من غير دموع..نفسها تبوسه..ونالت الفرصة العظيمة واستطاعت تبوسه في كل حته تقريبا

* المصيبة جت بقى..واد شحط..يعمل مني 15 واحد...كان نفسه يحضن تامر برضه...لا انت اكيد بتهرج!!
والله ده اللي حصل..قولولي ليه..هو تامر ده بيعملك ايه لا مؤاخذة..عشان ابقى في الصورة بس

* هدايا متواصة..سكارفات..وورد ونضارات..بتترمي تحت اقدام تامر..ولما اتلمت الناس وبقوا بيضربوا بعض عشان يوصلوله..ويشدوه من البنطلون..ايوه من البنطلون...الجاردات كترت وبقوا حوالي 20 محاوطينه..زي اللي حاوطه الرئيس كارتر في فيلم "في خط النار" بتاع كلينت ايست وود كده

* شاب مكتمل الرجولة تشوفه يشرح قلبك..طلعله عشان تامر يمضيله على القميص
اللي هو لابسه؟!!..يا نهار ازرق
ايوااااان..اللي هو لابسه حضرتك والله
فعلا الرجالة ماتت في 73...والاقصي اللي بيتهد ده...لو متهدش يبقى من ستر ربنا بس علينا مش حاجة تانية ..خالص

* تامر يخبرنا..انه هيفتح محل هدايا بهدايا محبيه...اللي ممكن يفتح منه محلات لو باع فردة الكاوتش بتاعة الهامر اللي راكنها برة..انا مش بقر يا تمور..بس بقول اني الناس اللي جايبهالك معرفش بتفكر ازاي...انزل !!واوضب هدية عشان تامر..صبرني يا رب..وبعدين يخبرنا انه بيشكر كل اللي وقفوا جنبه في الازمة..وكل اللي مصدقوش انه كان ضحية..وبينصح الشباب..انهم ميثقوش في حد تاني..عشان ميتخدعوش زيه كده...وبيشكر الناس اللي عملت تامر لوفرز
محسوبكم يسال؟ ...ايه تامر لوفرز ده
ترد عليا بنت قدامي ..ده موقع تامر على النت اللي الشباب عملتهوله وهو في السجن....وكانها بتقولي يا جاهل
قلتلها بنفس العبط اللي كلمتني بيه..فعلاااااا..الله..ما انا لازم ابقى شب فالانتين بقى

*تامر يجيلوا فنانين كتير طحن يحيوا في الميكروفون ويمشوا..ويعمل دعاية لفيلمه الجديد..واخيرا تامر بقى انترناسيونال..وبيشكر الناس اللي جتله من برة مصر عشان الحفلة..ودي حقيقة

* الحفلة انتهت وبيجروا بتامر..وبيضربوا الناس اللي نفسها تحظى...ببوسة او حضن من تامر...وبيرموهم بعيد عنه..وهما بيجرو عشان يوصل لسيارته الهامر السوداء ...

* تامر يطير بعربيته..والناس وراه...يمكن تلحق شوية من البركة...واخيرا ابص حواليا...الاقي ناس كتير طحن..على الاقل انا شفت منهم ستة مثلا...عاملين لوك تامر....نفس التسريحة....نفس اللبس...نفس الحزام...نفس الذقن الخفيفة


وفي النهاية لا تعليق غير اني في جملة طرات على ذهني وانا مروح

فعلا...اللي مالوش قدوة.....بيشتريله قدوة...وانتظروا مني قصيدة في هذا الصدد

لاني اما القدوة تبقى..فنان مبتدا..اخطا في حق نفسه وفي حق بلده....يبقى لازم يبقى لنا وقفة...وناخد كلنا صورة سوا....يا زمن صورنا..انا حطيتلكم الغنوة على المدونة..اصل حسيت اننا محتاجنهااا

كان معكم مراسلكم محمد حامد من حفل عيد الحب الذي احياه الملا" تامر حسني"


* حاجة اخيرة..كل عيد حب وانتم طيبين ومصر طيبة كده..وشعبها طيب...بس يكون حالتنا احسن من كده...يعني اللي قدوته وقعت في الشارع منه..ربنا يكرمه..ويلاقيها...وان شاء الله..هتشوفوا كلامي ده السنة الجاية..انا مؤمن اني الحالة هاتتصلح..اكيد هاتتصلح..عشان احنا غلابة والله

----------------

--------
تحديث سريع

لقيت في مدونة الصديق شارم..هذا البحث الرائع عن جيش مصر

http://sharm2t.blogspot.com/2007/02/blog-post_13.html

وكانه بيرد عليا..لا يا عم الرجالة لسة موجودة...ممكن تشوفوا بنفسكم الفيديوهات....تحيا مصر بجد ومتشكر يا شارم على انك رجعتلي بسرعة جزء من الامل المسلوب...لاني الدولة الي بيحميها جيش زي ده..مايتخفش عليها....ربنا يحميهم...وتحيا مصر كمان مرة

راهب القصر

Art washes away from the soul the dust of everyday life " pablo picasso"

هذا ما حدث تماما معي ...قليل من الموسيقى...والقليل من امتاع تلك العينان الكئيبتان بلوحاتك الرائعة...والكثير من تلك الكلمات المسترسلة التي خرجت مني دون وعي او شعور...كل هذا كان كفيلا ان يغسل تلك الروح من اتربتها الكثيفة..ومن تلك البقع السوداء التي تملكت منها... تماما كما قلت...تماما كما توصلت

---------------

سيدة القصر

------------------

اتمنى أن تنسني ليلة
نصف الليلة
لحظات
أن يهمس قلبي.. كلمات
غير الكلماااات
اتمنى ان تمضى سبيلي
أن تجدي في الدرب بديلي
تنضمي لفرقة تمثيلي
وترسمي تلك البسمات

---
فاني... يا سيدة القصر
من عصر..ولّت ازمانه
من بلد ....اغفلت مكانه
والقصر العائم ربّانه
في مكان.. غير بلادي
في زمان.. غير الماضي
وتاريخي ..مسجون فيه
وعشقت ..بروحي اغانيه

---
والحاضر.. يا سيدة القصر
مقفلة كل دروبه
مشتعل فيه حروبه
غطتني اليوم ذنوبه

---
والقادم ..يا سيدتي
ظلمات.. فاقت انواره
اشياء ..علّت اسواره
والنجم ..قد ضل مداره

---
والراهب.. يا سيدتي
باكي
يتضرع بدموع
شاكي
في كل الاوطان.. يراكي

في كل الازمان.. يراكي
الراهب يا سيدتي
قد سئم زي الرهبان
قد كره تلك الاوطان
سيكسر كل القضبان
ويجوب في تلك الازمان
سيطير الراهب..
يمضي سماكي
سيثور الراهب..
يجد سواكي
اه..ا ه ه
سيعيش الراهب ...لولاكي

---
لو تنسه ليلة
سيحلق ما بعد سماكي
لو تنسه ليلة
سينسى الراهب رؤياكي
لو تنسه ليلة
نصف الليلة
لحظات
لو يهمس قلبه
كلمات
غير الكلمااات

----------

M.H.R

* The marvelous painting for the great artist (pablo picasso)...the women in the armchair is olga...his wife and the only love in his long life

* The music track for (Austin Wintory) the great modern composer...the track name is (2nd move ment...romantic galactic tour)

الاولة اسف..والتانية تاج...والتالتة

الاولة..اسف

انا كنت مسافر كم يوم اسكندرية…ولسة جاي النهاردة..انا بجد بعتذرلكم عن التاخير في الرد على تعليقاتكم والتاخير عن متابعة بلوجاتكم الرائعة…وعايز اعترفلكم اني افتقدتكم فعلا..واول مرة اعرف قد ايه موضوع المدونات ده بقى جزء من حياتنا…وحشتوني كلكم


الثانية ..تاج

انا لسة بقول يا هادي وبشوف التعليقات وكده..لقيت التاج ده اتمررلي من مدونة "يا مراكبي"…وانا بشكرك قوي انك افتكرتني بالتاج…والتاج او التاجين بقى…اهم..بس يمكن مردش عليهم كلهم منعا للاحراج..هههه….
ردودي على اسئلتهم اهي…بس انا هكتب الاجابة بسرعة عشان مفكرش كتير بحيث اجابتي تكون اصدق ما يمكن


اية اللي حيحصل لايميلك لما تموت؟
بصراحة انتوا بتقلبوا عليا ذكريات اليمة كده...انا اصلا عارف فعلا ايه اللي هيحصل ليه...اصحابي القريبين مني هيفضلوا محافظين عليه مفتوح...زي ما انا واصحابي عملت مع اعز اصدقائي الله يرحمه..ويلحقنا بيه في رياض الصالحين ان شاء الله

اديت الباس وورد لحد قبل كده؟
اه اكتر من شخص...اللى دخلوا دائرة الثقة الصغيرة بتاعتي...من 5 سنين عشرة وانت طالع كده

كانت طبيعة علاقتك بيه ايه؟
اعز اصدقائي

اسمك؟
محمد حامد راشد..اسم فني فعلا..

اسم الدلع المشهور وسط اصحابك؟
حامد...ممكن ميدو..وفي البيت حمادة...وساعات حامد الجامد...واسامي تانية في ناس كتير هتضحك اول ما تقرا السطر ده...عشان الاسامي دي هاتيجي في بالهم "كلمة والسدغ والكرف مثلا"عارفين ايه هي الاسامي دي

عمرك؟
21 سنة و5 شهور وكام يوم كده...راشد فعلا يعني مش اسم بس

برجك؟
العذراء...الى كل رواد هذا البرج..ارجوكم..كفاية رومانسية وعبط

مجال دراستك؟
هندسة عين شمس...اخر سنة وبدعواتكم ان شاء الله هخلص وابقى مهندس مدني...ومحدش يستغرب على حوار الشعر ده...ده عشق خاص

شخصيتك نوعها ايه؟
توشيبا....اصل السؤال ده صعب بصراحة...انا ممكن اقول كوكتيل مشاعر زي أي بني ادم...لكن أي حاجة صعب اقولها عن نفسي...خصوصا اني شخصية عظيمة...ههه
لا بجد ممكن تقول اني هادي بطبعي وعكس كده ده تمثيل طبعا..رومانسي طينة..ودي ماساه...صريح..ودي ماساه اكبر منها...بحس قوي بالناس..وعيوبي متعدش...خجول...وساعات مباخدش الامور ببساطة...وكسول ساعات...دائما بابا يقولي كده وانا ااوحه طبعا بالفطرة والاجسام المضادة اللي جوايا...لكن معاه حق ساعات ببقى كسول فعلا....والموضوع كبير يعني...ممكن تقولوا انتوا رايكم فيّا بقى اسهل

السفر بالنسبة لك؟
خوفي الاكبر...وساعات حلم بيراودني

المود بتاعك؟
هو بقالي فترة كل الناس بتقول انه كآبة..مع اني بعمل طول الوقت عكس كده..الظاهر اني مبعرفش امثل خالص

وقت فراغك بتعمل فيه ايه؟
يا بكتب يا بقرا...يا مع اصحابي

الاكلة المفضلة؟
فراخ بالمايونيز...لا بجد بحبها..بس مش المفضلة هي اللي جت على بالي عشان كنت بكلها من شوية

الصفات اللي خدتها من بابا؟
المثالية!!..يعني كتير بلاقي نفسي ماشي زي ما الكتاب بيقول...مع اني الكتاب بتاعنا قديم قوي بالنسبة لحياتنا دي..لكن انا حابب ده زي ما هو كمان حابّه..وكمان خدت منه شوية حكمة على خفيف..وحنية كتير..وشوية ذكاء اجتماعي على خفيف برضه..قلق كتير..وعصبية كتير...واصول كتيييييييييييييير

الصفات اللي خدتها من ماما؟
الطيبة..والصراحة...وحب الحياة...لسة بيتكون عندي جديد حب الحياة..بس هي كلها حب للحياة

اكتر 6 حاجات بتكرهها؟
الاحباط
الغباء
الخيانة
نكران الجميل
الكدب
الحديث بالباطل..خصوصا في الدين

اكتر 6 حاجات بتحبها؟
مصر
اهلي
اصحابي
الشعر...بالذات صلاح جاهين
الحاجة الجديدة..علم..مجتمع..فكرة..تكنولوجيا.. زي ما تيجي
الحب نفسه


الشغل بالنسة لك؟

هدف...ووسيلة لتحقيق الذات..وممكن تحقيق الحلم كمان..وملل رهيب لو شغل روتيني او مبحبوش

ايه الكمبيوتر والانترنت بالنسبة لك؟
جزا لا يتجزا من حياتي....بكل الاوجه بقى

...

التاج التاني بقى..... الخمس حاجات اللي ماحدش يعرفها عني؟

كتبت اكتر من حاجة ورجعت مسحتها تاني...اصل الحاجات اللي محدش يعرفها عني اكيد مش هاجي فجاة كده واقولها..بس عموما انا كنت هاكتب حاجة عن امنية دفينة عندي محدش يعرفها خالص..تخص مهنة كان نفسي اطلعها..بس دلوقتي بقت طيف كده في خيالي..ممكن اسيبكم تخمنوا هي ايه!!


التالتة...اسكندرية..والبحر...والشعر

انا كنت ناوي اعمل الزجلية دي في تدوينة لوحدها..ولكن نظرا لانكم وحشتوني فعلا...فقلت اعملها مع التاج والتدوينة دي..وطبعا هتحمل مخاطرة اني التدوينة كبيرة وممكن تتظلم..ومتتقراش...لكن انا برضه هكتبها عشان انتوا وحشتوني

---------
خلصنا امتحانتنا وطلعنا على اسكندرية...وفي وسط التهريج والضحك ببص للحتة اللي انا قاعد فيها في العجمي..لقيتها مكان غالي عندي قوي وليه ذكرى كبيرة في قلبي...ورغم كده ماكنتش واخد بالي في الاول..عشان الشوارع شبه بعضها...لكن لما بصيت حواليا..اتاكدت...ايوه هو ده الشارع..وكان ورانا ساعاتها البحر...وكانت دقات قلبي عمّالة تزيد لدرجة اني سامعه...ووشي احمررررر...ما كنتش عارف اقوللها ايه..ولا ابدا الكلام ازاي...لكن فجاة....كل الكلام طلع مرة واحدة..ومن كتر لغبطتي اعتقد انها مفهمتوش كله..اصل قعدت حبّة اتكلم ومقولش حاجة مفيدة..لحد ما الكلام بدا يتوزن..وقلتلها كل حاجة...واديني بالصدفة جيت لنفس المكان تاني...وكاني مكتوب على جبيني..غير قابل للنسيان...اديت ضهري للطريق المرة دي وبصيت للبحر اللي المرة اللي فاتت اديته ضهري...وقعدت اكلمه ويكلمني بموجه اللي انا بعشقه...خرج مني الكلام ده...اللي معجبنيش قوي ..لكن كنت حاسّه قوي..واهم حاجة سواء الكلام وحش او حلو..انه طلع وخلاص..دي علامة صحية..واني انبسطت قوي في السفرية دي..دي برضه علامة صحية

------------------

فارس زمان
-------------------------
من زمن كنا هنا
من شهور
من ساعات
لأ من ثواني
وكوني كان مبدووور زهور
والسكات
عازف اغاني
----
نفس المكان
والبحر كان قدامي برضه
يومها داب قلبي حنان
وفضلت مستني في ردّه
ولما شوقه ليّا بان
انكتب في جبيني وعده
قلتله.. انه حبيبي
واني عمري ما احب بعده
---
واديني جيت
وفيت وعودي
قلتي يا ريت
نطيت سدودي
وبنينا بيت
وانتي شهودي
وفي يوم صحيت
---
مالقيتش عودي
ولا صوابعي بيعزفوا
ولقيت قيودي
وايديا دول اتكتفوا
اديني جيت...
وفيت وعودي
وفين وعودك
ليه اختفوا؟!
---
نفس المكان
وانتي مش جنبي
فارس زمان
ونبلي ذنبي
هرب الحصان
بعد ما طار بي
نط في بحور
بلون عيونك
وفات مهور
كتير بلونك
رسمالي ذكرى
... وابتسام
وقلبي ناسي ...لا ملام
لا أنتي اهلي ..

ولا انتي ناسي
ولا انتي

......

..........
خلص الكلاااااااام
-----------------------

M.H.R