شجرة دارنا

بقالي يومين كنت عيّان قوي...وقاعد في البيت انا وماما وكأننا بنصور كليب "ست الحبايب"...انا نايم وهي سهرانة...او انا مليش نفس اكل وهي مبتاكلش عشاني...وصادفت اني من يوم الاربعاء نفسي اكتب حاجة عن عيد الأم..اولا لاني مكتبتش عن الموضوع ده قبل كده غير وانا صغير وكان كلام على قد براءته وجماله الا انه ساذج برضه نوعا ما...وثانيا لاني كنت مستني اتناول الموضوع ده بفكرة او تشبيه جديد عشان مبقاش بقول كلام متكرر

وصادفت برضه اني يوم الخميس..حضرت محاضرة اداهلنا رئيس القسم اللي بيشرف على مشروع التخرج بتاعي...ودي اول مرة كان يدخلنا...ومن المرات النادرة اللي اشوف فيها دكتور في كليتي ليه فكر او فلسفة معينة...هو يبان في الاول انه غريب قوي..لكن بعد شوية تكتشف انه فيلسوف قوي..وانه بيفكر ويتامل بعمق قوي اي حاجة قدامه...واعتقد اني ده اللي وصّله للي هو فيه..المهم

في نص المحاضرة الموضوع تفرع منه الى موضوع جانبي وفجاة...قال لواحد قوم اقف..وساله سؤال

ايه الفرق بين السمكة والشجرة؟

ومن الطبيعي جدا اني الولد يجيله ذهول ويندهش ان ده سؤال موّجه لطالب في بكالوريوس الهندسة المدنية

جامعة عين شمس

الواد يا عيني كتمها في صدره وفضل ساكت..اللي هو انا ناقصك يا عم..مش كفاية دماغي اتلحست لوحدها

وبدا الدكتور يقول الفرق

السمكة في رايه...كائن عادي بياكل ويتحرك ويدوّر على رزقه لحد اما يجي اجله ويموت...ولو ربنا اراد اننا ناكله هناكله..اما لو ما ارادش هيموت ويتحلل زي كل الكائنات التانية

اما الشجرة في رايه..فهي رمز للعطاء

وكلّمنا عنها كلام كتير...وهو كلام مطابق للحكاية الماثورة بتاعة الحطّاب والشجرة اللي كلنا قريناها واحنا صغيرين

الشجرة يا حضرات...كائن عظيم..وهي عايشة بتديك من ثمراتها...وممكن لو تعبان تروح تسند ضهرك عليها...ولو الدنيا شمس وحر تروح تقعد تحت ضلها...ولو نسيت كل ده وطلبت معاك تقطعها من جدرها...هتتقطع واقفة...هتنفصل عن جدرها وهي صالبة طولها وعظيمة زي ما كانت طول عمرها...ومش بس كده...لا دي هتديك برضه خشبها اللي بتستفيد منه...اما لو بردان ووصلت بيك الاسوة انك تحرقها عشان تتدفى...هتدفيك...ورمادها كمان ينزل لباطن الارض تاني عشان يرجعلك في شكل طاقة مرة تانية تستفيد بيها..يعني باختصار...بتديك كل اللي انت عايزه وهي عايشة وبعد ما تموت كمان..ومش طالبة منك اي مقابل

بالذمة في عطاء كده؟....من هنا الفكرة اللي كنت بدور عليها عشان عيد الام لقيتها...ناقص اني اكتب بقى اول ما احس بالكلام على طول....امبارح بقى وانا في عز التعب ونائم زي القتيل..حلمت اني قمت في نص الليل كتبت حاجة على الموبايل ونمت تاني

والنهارده لما قمت..مطلعش حلم...طلع الكلام ده...انا بهدي الكلام ده لأمي ولكل الامهات اللي بيمثلوا في حياتنا شجرة العطاء في وسط بيوتنا..واللي من غيرها مش هنلاقي لا سند ولا ضل ولا جذور ولا فروع

والمدهش بقى اني اتاخرت كل ده عشان اكتب كلام ناضج بقى ..مش زي كلامي عنها وانا صغير..لكن سبحان الله الكلام طالع كاني لسة عندي 10 سنين برضه...الظاهر اني مهما كبرنا بنيجي عندها ونقف عند السن ده...هما دائما يقولولنا كده بس احنا مبنبقاش مقتنعين...لكن انا دلوقتي اقتنعت تماما..والدليل اهو قدامكم

كل سنة وانتي طيبة يا ست الحبايب

------------

شجرة دارنا

------------------

كان يا مكان

كان في شجرة ..في وسط البيت

وشجرة بيتنا بقالها زمااان

من جدرها.. للدنيا انا جيت

وف حضنها ..فيه الخير الوان

وف ضلها عشت..اتربيت

والمولود ..اصبح انسان

كان يا مكااان

------

كان يا مكاان

كان كل اما اشكي

واسند راسي عليها واحكي

بتضمني بفروعها وتبكي

والقى الحزن كأنه ما كاااااان

وكان يا مكان

-----

كان يا مكان

كان جدرها عالي

ناسية الاسوة

وخير فاكرالي

واحزن ليلة

تبكي ليالي

وكان...يا مكاااان

-----

كان يا ما كان

اليوم يوم عيدهاااا

شجرة دارنا

يا ربي اسعدها

وفروعها يا رب الكون ده تزيدها

ونكتب ليها ونبوس ايدها

ونرسم صورة بالالواااان

وكان يا مكااااااان

----------

M.H.R

-----------------

طب اقول ايه؟؟

الصورة اللي فوق دي انا خدتها من مدونة استاذ حسني سليمان

ممكن تتخيلوا احساسي لما الاقي صور وفيديو لحفلتي في مدونة استاذ حسني..من قبل حتى ما الصور تجيلي من الصحبجية نفسهم

http://hosny45.blogspot.com/2007/03/blog-post_14.html

انا البوست ده ..كتبته ومسحته اكتر من مرة....عارفين ليه؟

عشان حاولت اعمل حصر للناس اللي وقفوا جنب الصحبجية وعملوا اعلان عن الحفلة من المدونيين لمجرد الود اللي بقى يجمعنا بفضل اللقاءات او لمجرد اني كلامي كان بيعجبهم هنا....والناس اللي جم منكم الحفلة..والناس اللي باركولي بعد الحفلة..انا بجد اول مرة احس اني مش عارف اعبر عن فرحتي بيكم..ولا عن شعوري بثقكم فيّا

-------

بجد اني اقول شكرا لكل واحد فيكم ..ده مش كفاية...واني اذكر اسمه وهو عمل معايا ايه..برضه مش كفاية..كل اللي اقدر اقوله انه كلكم بقيتم من الصحبجية خلاص..وكلكم بقيتم زي اخواتي تمااام..بجد انا كنت طاير من الفرح بعد الحفلة...مش مصدق اني كل دول لبّوا الدعوة وجم...يا صحبجية يا مدونيين ...يا اجدع ناس...بجد بشككم من كل قلبي...اولا عشان اللي عملتوه..وثانيا عشان كنت فاكر اني الناس اللي من النوع ده خلاص..مش موجودين في بلدنا الايام دي

انا قررت اكتب من الذاكرة المدونيين اللي هفتكرهم لاني مش ممكن باي طريقى اقدر اعمل حصر لكل اللي عملوا معايا المواقف دي

في البداية وبشكل خاص....احب اشكر:

استاذ حسني سليمان..مدونة افنان الفنون

اولا لاني مجية حضرتك عندي بالدنيا وثانيا على تشجيعك الدائم للشباب ولمواهبهم ورابعا على البوست اللي كتبته والفيديو اللي نزلته...استاذنا...ربنا يخليك لينا بجد

ياسمين ..مدونة سكاي لايت..ميرسي يا ياسمين قوي لانك مش بس بتصنعي احلام اللقاءات..لا ده انتي بتشاركي فيها كمان...ميرسي لاهتمامك وبجد نورتي

محمد...مصر هي امي

محمد لو اخويا كان هنا مش مسافر..اقسملك انه كان هيعمل زي ما انت عملت بالضبط كده...بجد شكرا يا محمد

طارق...واحد من الناس

اكيد انت حسيت بيا لما شوفتك...شوفت قد ايه كنت مبسوط باللي انت عملته معايا...اهلا بيك في الصحبجية يا طارق

سمراء النيل...انجي

اني سمراء النيل تيجي...دي مش حاجة قليلية خالص عندي...متشكر قوي يا سمراء ومتشكر على احساسك الدائم باللي حواليكي..وكنت مضايق لما حسيت انك زعلانة من المشروع وهمّه

عمرو ..اريدك انثى

انا حاسس اني صداقتنا في الطريق اهو..ومستنييك ترجع للتدوين بسرعة..شكرا يا عمرو...ونورتني

هباز...aranging mu papers

نورتنيني يا هبة وكنت مبسوط اني شوفتك قوي

وينكي..انتي عافة احساسي من ساعة ما قريت اعلانك..اول واحدة تعلن عن الحفلة هو انتي...وتعبك يوم المؤتمر مع حضورك..خلاني طاير بيكي...والسيكولاتة في الطريق ان شاء الله

maat>>two pairs of eyes

اول ما قلتي حامززز....قلت هي دي....بجد انا انبسطت قوي اني شفتك..نفس خفة الدم اللي على النت

epitaph

ابي...نورتينااااا...وكلامك عننا في البوست بعد الحفلة...حاجة فوق الرائعة..صحبجية صحبجية يعني

ولسة في كتير قوي

وشوشني..متشكر قوي على تدوينتك وعلى كل اللي عملتيه معايا

محمد ياسر...نورت

مادو

عبوود

ودول منهم اللي علق واللي تعب معايا ومنهم اللي عمل اعلان هن الحفلة

وبرده لسة كتير..والله ما عارف اقول ايه ولا ايه

ايهاب ايجلز

ايمن راسبوتين...فرحت بسؤالك عني

مايكل..مايكليتو..الف سلامة عليك

احمد حداااد...كنت منتظرك تشرفني هناك..والحمد لله انك عملتهاا

ice president

el2hwagy

nadine

safa7 karmooz

يا مراكبي

mano

memo

ابراهيم معايا....نورتني...ومبسوط برايك في الكلام...لاني ذوقك راقي جدا

توتة توتة

ايهاب..دنيااا.......الله عليك وعلى ارائك وعلى مجيتك....بس انت جيت ببلاش عشان مواليد مارس...فين البيبسي بتاعي بقى؟؟

مصعب...مرورك عليّا بجد حسسني قد ايه انت مهتم رغم اللي كان شاغلك...نورتني والله وكل سنة وانت طيب...وانا زعلان جدا اني توتر الحفلة نساني الموضوع ده للحظة رغم اني فاكر اني اول ما اشوفك اقولك عقبال مية سنة يا مصاعيبو

انا طبعا كده لسة ناسي كتير..بس صدقوني من الذاكرة افضل لاني لو قعدت ادور...اكيد هنسى حد..فهيزعل مني..فقررت افتكر من دماغي..عشان لما انسى يبقى حاجة طبيعية

واتمنى تكونوا انبسطوا يومها..ويكون الصحبجية نالوا اعجابكم..او حتى رسموا بسمة ولو صغيرة على وشوشكم

وان شاء الله اراءكم كلها تم تسجيلها..وهنراعيها في الحفلات الجاية...لاني كلنا فريق واحد في الاول وفي الاخر

--------------------------------------------------

---------------------------------------------------------------------

دول الصحبجية المدونين

صحبجيتنا بقى..ليا معاكوا كلام كبير قوي....كلام من هنا لبكرة..مبروك يا جدعان..الف مبروك......بجد شرفتوني وشرفتوني وشرفتوا اهاليكم وتعبنا الحمد لله ماراحش على الفاضي...عقبال الحفلة الجاية بتقدم اكتر وصحبجية اكبر واداء احسن...ومكان اروع

رجالتنااااا...انا بجد فخور اني واحد منكم...........

ميشو..رغم انك مش هتقرا الكلام ده...شكرا يا شقيق...لو كنت لفيت الدنيا مكنش حد هيفهم كلامي كده ولا هيلحنه كده

بدوي....بادوسا....انت عارف اللي فيها كله من ساعة ما بصتلك على المسرح....بس فين كوكي؟

looooooooool

انور.......جدع ياض...تعبك ومجهودك بيّن انك اتقدمت كتير...والحتة بتاعة قاعد حزين كانت احسن مرة اسمعها منك في الحفلة........وبجد كنت واجهة كويسة للباند يا انور

ابتهال....عندي كلام كتير عايز اقوله عنك اوله اني بجد كان لازم تبقى معانا من زمان

ميدو...اضافة يابني والله...كنا محتاجينك معانا..وان شاء الله هتعقل قريب

عطوة....نجم الحفلة الكبير..بجد اداء فوق رائع يابني

عمرو....الله عليك...في وقت قليل اندمجت قوي معانا

حودة جمال....حودة جمال ..حودة جمال

عمر.....يا دماغك العالية ...افتكرنا لما تشتهر بس..متنسنيش يعني

رؤوف......حبة حبة كانت مسك الختام والله...الناس كانت مبسوطة بيها اخر حاجة...احيك يا شقيق

ابو الصالحين...في امل يابني منك..هههه....لا بجد اغنية حلوة قوي يا شقيق ومستنيين اللي جاي

-------------------------------------------------------

اخر صحبجية واقرب صحبجية لقلبي

حودة...وايهاب ..وبطاطس..واحمد محمود...وعلاء ...وعبد الله واسلام اللي ماجوش...بس لما اشوفكم

يا رب جمعنا دائما كده ومتحرمناش من بعض ابدا

وفي النهاية احب اشكر كل حد قالي كلامك كويس.. وكل حد كتب عني كلمة...وكل حد كلمني وباركلي واي حد حس بالكلام وبكل اللي كان نفسي اقوله في الاغاني دي.....بجد رايكم رفع معنوياتي للسما السابعة..استنوا مني كلام وافكار .. كتير قوي..قوييييييييي
والسلام ختام...وعقبال الحفلة الميّة...وكل المدونيين يبقوا برضه معانا

الصحبجية...حتة من قلبي

الصحبجية امتى؟

في يوم من الايام من حوالي اربع سنين..كنت في سكشن..واتعرفت على واحد اسمه محمد اسماعيل

انسان هاديء الطباع وترتاح لما تتكلم معاه..وعلى غير عادتي قعدت اتكلم معاه كتير قوي...قوي لدرجة حسستني بالذنب لما روحت...انا عارف اني رغاي ورغاي قوي كمان...لكن مش مع حد اول مرة اشوفه...وسبحان الله يوم عن يوم اكتشفت انا ليه كنت برغي معاه كده...البني ادم ده لازم يتصاحب فعلا...فيه كل صفات الصديق الوفي المخلص والصفات اللي بانتلي مع السنين والمواقف..وانا بقول الكلام ده براحتي لانه معندوش بلوج ومش هيقرا الكلام ده عشان كده قلته براحتي

بعد ايام من معرفتي بيه..اكتشفت انه بيلعب جيتار وهو اكتشف اني بكتب كلام...يوم كمان..اكتشفت انه عنده فرقة بتعزف غربي...ويومين كمان وقالي انه نفسه يعمل حاجة شرقي...ضحكت وقلتله الكلام موجود..يا مين يلحن..واديتله كلام كنت كاتبه قبلها بيوم

من هنا بدات الصحبجية...انا اكتب وميشو(محمد اسماعيل) يلحن...ماكنتش لسة الصورة واضحة ولا كان في فرقة من اصله....وفي خلال التلات سنين دول...فضل يدور على اعضاء الفرقة دي..وزي ما يكون مكتوب لنا نعمل الفريق ده...جوه كليتنا لقينا مواهب مذهلة وبرة الكلية كمان....الحاجة الوحيدة اللي جمعتنا في رايي هي الحب....احلى حاجة اننا كلنا اصحاب ..حتى اللي انضموا جديد..ماخدوش وقت كتير لحد ما بقوا اصحابنا......من هنا سمينا نفسنا الصحبجية....كل اللي جمعنا اننا جوانا طاقة..احساس وافكار وحاجات كتير نفسنا نطلعها...ولما جت الفرصة...جينا عشان نحاول اهو

اول حفلة كانت في حديقة الازهر 21/9/2006 واليوم ده اتحفر في ذاكرتنا كلنا..اخيرا بعد كل الصبر والانتظار ده... شايف قدامي كلامي بيتغنى والناس مبسوطه بيه..كل واحد فينا حس الاحساس ده..اللي كتب واللي الف واللي تعب عشان يجهز للحفلة ولدعايتها...وبرضه كل اللي كان مجمعنا كلنا هي حاجة واحدة...اننا حاسين ببعض قوي..وبنحب بعض قوي..احلى حاجة في الكون انك تعمل حاجة انت بتحبها ومع ناس بتحبها....اجواء الصحبجية دي انا فعلا كنت مفتقدها وسط رتابة وملل ورزتين حياتنا دي..انا ميشو مرة قالي اني اليوم ده تقريبا هو اليوم الوحيد اللي كنت بضحك في من قلبي...مش ضحكة مصطنعة مخبية وراها بلاوي..ودي فعلا حقيقة..كل واحد يومها كان حاسس انه يوم فرحه

والنهارده حلمنا حاسه بيكبر قدام عينينا...عددنا زاد...والصحبة كبرت....وافكارنا نضجت...ومستوانا اتقدم...وزي ما احنا مقتنعين قوي باللي بنعمله نفسنا تكونوا معانا يومها ونفسي اللي هيجمعنا يومها برضه يبقى حاجة واحدة بس

الحب...ساعتها بقى يبقى كل امنياتي اتحققت في يوم واحد

في انتظار رؤيتكم يومها ...الصحبجية هتغني في ساقية الصاوي يوم الثلاثاء القادم 13/3/2007 الساعة 8 مساء

الصحبجية ازاي؟

مزيكتنا جديدة..مينفعش تصنفها...نابعة من احساسنا بالحالة والكلام...يعني في رايي الشخصي انك هتلاقي موسيقى شرقية لما نتكلم من صعيد مصر...وغربية لما تلاقينا مهاجرين بكلامنا..وكلاسيكية لما نوصف حالات الحب والمشاعر...مينفعش تصنف موسيقتنا...وانا اصلا بكره التصنيف لانه عبارة عن سجن بتسجن نفسك جواه

معظم الاغاني من تاليفي...وفي اغاني من تاليف محمد رؤوف صاحب بلوج كلمة..واغنية الفها الصديق محمد ابو الصالحين..افكارنا متنوعة...في منها اللي بيقول احساس وفي اللي بيناقش قضية وفي اللي مجرد حالة..وانا اخترتلكم بعض اجزاء منها عشان تاخدوا عنها فكرة...وطبعا حقوق الملكية الفكرية محفوظة للمؤلفين وموثقة في الشهر العقاري كمان

طبعا دي مقتطفات بس من الاغاني ومش لحد اخرها وده عشان مطولش عليكم اكتر من كده

العجوز

ذقنه بيضا..ولونه اسمر
شوفته ..قلبي حنّ ليه
ضحكه فوق الخد سكر
والحنان ساكن عينيه

سألت نفسي ..ازاي أكون
ارتحت ليه وانا معرفوش
يمكن عشان..طيبة العيون
ولا الملامح..والرموش
لوحة للقلب الحنون
مش ناقصها غير رتوش

****************

محمد حامد

M.H.R

قاعد حزين
قاعد حزين في الفجر..والليل سكون
نزلت سنين العمر .. دمع العيون

وليه يا ليل؟..في القلب يأس
لا عاد غنا..ولا حتى رقص
حضنني ليلي..وقاللي بس

بكرة تشوفها بأحلى حال
ألفين سؤال
بيقولو ليه؟!!

..في بلدنا حال
من اليأس بيه
الليل ده طال

دمعي مداريه

***********

محمد حامد

M.H.R

فرصتك
مرّة واحدة بتيجي هي
وتعيد كتابة قصتك
ممكن تخلي الصعب ميه
وتعيد لوشك بسمتك
مرّة واحدة يا ريتها ميّة
والأسم هي.. فرصتك
*****************

محمد حامد

M.H.R

حبة حبة
حبّه حبّه .. كترنا حبّه
وكل مدى.. نزيد محبة
املنا جنة.. لعيوننا غنّى
الكل واحد..نفسه في محّبة


وغني يابني ..وعلّي صوتك
إياك كلامك..يكون سكوتك

وواحدة واحدة..وبالهداوة
هنبقى قوة ..تكسر تابوتك

******************

محمد رؤوف

بحر ازرق
يا بحر أزرق ...موجة حنيني..موجة حناني
يا بحر أزرق ......لون عيون الأولاني

قلّب يا بحر..الذكريات
وروح وهات..أجمل اماني
وارجع بقلبي للي فات
أيام صبايا الأولاني
أيام صبا والعيون ..كانت لسان

أيام صبا .. والقلب كان لساه جبان
*************

محمد حامد

M.H.R

اول ليل
كان لما يجي الليل
نغنّي ليلنا بطوله
وده أصله أول ليل
مالقاش كلام أقوله

الليلة قلبي وحيد
وانت عينيك وحشاني
صوتي كأنه بعيد
صوتك في وجداني

معقول بغنّي لوحدي
وانا عيني مش في عينيك
ده ماكانش يطلع صوتي

إلا وايدي في ايديك

**********

محمد حامد

M.H.R

كانه امبارح

كنت نزلتها في تدوينة على هذا الرابط

http://m-rashed.blogspot.com/2006_10_01_archive.html

هتلاقوها تاني تدوينة في هذه الصفحة بعنوان كانه امبارح

ومن افكارنا الجديدة موضوع الالبوم اللي كلمتكم عنه المرة اللي فاتت

concept album

فكرته بتدور عن مصريتنا اللي ادفنت جوانا وتاهت وسط التغيير...عايشين عيشة مش بتاعتنا..ولابسين لبس مش بتاعنا وبنسمع مزيكا مش بتاعتنا وثقافة دخيلة علينا...لكن لو حصل موقف اثار فيك مصريتك اللي عليها التراب دي...هتصحى تاني جواك والغبار اللي عليها ده هيتناثر...وانا عرضت في الالبوم وجهة نظر المؤيد للتغيير والمعارض ليه...الالبوم مكون من اربع اغاني..اخترتلكم منه جزء من غنوة واحدة وهي الثانية في الترتيب وعنوانها هو نفس عنوان الالبوم واتمنى يعجبكم لما تنورونا في الحفلة ان شاء الله

البوم الدوار

الدوار

بيقولوا علينا اتغيرنا

والتوهة خدتنا في مية مشوار

طب بس قولولي ايه مصبرنا

ومعيشنا لو كنا في نار

انا اللي هاقولك يا اخينا

عن ارض عليها امانينا

شوارعها بتشدي باغانينا

ودي بينا عمار

نفس الدوار

نفس الانسان

احلامي ..وجبة وقفطان

******************

محمد حامد

M.H.R

الصحبجية مين؟

Ahmed Anwar ......................vocal

mohamed ismaiel ................lead guitar&ouD

mohamed emad ....................violin

mahmoud gamal ...................rhythm guitars

mohamed el-badawey ............Bass guitar

omar yasser ..........................drums

Ahmed atwa..........................darabuka & duff

lyrics:

Mohamed hamed

Mohamed raouf

Mohamed abu el-salheN

composer:

mohamed ismaeil

ومينفعش انسى العضو الجديد عمرو الزناتي عازف البركشن والصوت الملائكي ابتهال اللي هتشاركنا في غناء عدد من الاغاني

واحب اقولكم كمان عن صحبجية من نوع تاني..الناس اللي بكتشف قبل كل حفلة انهم اعضاء معانا في الفريق من غير ما يكونوا مشاركين بحاجة مادية...الناس اللي بيشاركونا معنويا وبروحهم وتشجيعهم...واخص بالذكر في عالم التدوين

محمد

مصر هي امي

بجد يا محمد بشكرك قوي على مجهودك اللي بذلته معايا واللي نابع برضه من انك انسان جميل وكل اللي جمعنا سوا هو الحب...ربنا يديم المحبة دي وبشكرك للمرة التانية على اعلانك عن الحفلة في اللقاء وعلى اعلانك المكتوب في مدونتك...لما انت تكتب عني يبقى كاني مصر كتبت عني لانك بتحبها كل الحب ده زيي ومدونتك تحمل اسمها....شكرا يا محمد يا صحبجي..ما انت كده خلاص من الصحبجية..اللي يعمل معانا كده لمجرد المحبة يبقى من الصحبجية..واشوفك يوم الحفلة ان شاء الله

وينكي
حاجة صغنونة كده

بشكرك قوي يا وينكي على اعلانك عن حفلتنا في مدونتك....وعلى انك جاية رغم صعوبة اليوم ده بالنسبة لك...بجد من قلبي شكرا

وبشكر كل المدونين وغير المدونين اللي اهتموا وساعدونا في الحفلة دي او الحفلة اللي فاتت..وفي انتظار انضمام الكل معانا في عالم الصحبجية....مستنيين الكل يبقى معانا...ونغني كلنا من قلبنا في اليوم ده

الصحبجية في صور

الصحبجية فين؟

الصحبجية هتغني يوم الثلاثاء القادم ده 13/3 في ساقية عبد المنعم الصاوي بالزمالك الساعة 8 مساءا

For Further info please contact us:
E-mail: El-So7bageyya@hotmail.com or visit www.culturewheel.com

THE BAND FLYER IN THE PREVIOUS POST

لقاء المدونين..صحبة وصحبجية

انا كنت المفروض ناوي اكتب عن اللقاء الثالث للمدونيين بس ...واقول رايي فيه واحكيلكم انا حسيت بايه وايه اللي

دار في دماغي لما اتقابلنا لكن كنت مليان كلام تاني...فبقيت محتار اكتب عن ايه ولا ايه..لحد ما قررت اكتب كل حاجة...يلا ان شاء الله ما كان حد حوش...واستحملوا صداعي بقى

لقاء الصحبة (المدونين)...واسمحولي اقول عليكم صحبة
لاني كنت حاسس بكده نتيجة لقاءنا اللي فات...محستش بالغربة رغم كل الناس الجدااد اللي كانوا معانا..يمكن لاني مدونين اللقاء السابق كانوا موجودين ويمكن لاني ارتحتلكم... مش عارف

اللقاء بدا في ميعاده على ما يبدو في دار الاوبرا المصرية...وعلى ما يبدو دي نتيجة وصولي متاخر ساعة عن الميعاد...عدد فاق توقعاتنا..ما شاء الله ..ممكن يكون تلات او اربع اضعاف اللقاء السابق..المرة دي حلم ياسمين عمال يكبر اكتر واكتر و احنا وراها...لكن واضح اني عدم توقعنا لهذا العدد..ادى لهذا اللقاء سمة عدم التوفيق نوعا ما....نقلا عن اراء الحاضرين وانا معاهم...سعدنا جدا اجدا بهذا العدد وكان نفسنا وكل منانا يكون الحوار اكثر ترتيبا من كده..ويكون محدد الملامح

60 مدون ومدونة
تقريبا
عدد لا يستهان به على الاطلاق..عدد اذا دل على شيء يدل ان المدونين اصبحوا على استعداد الى تفعيل دورهم في ارض الواقع...اختلفت الاراء والاقتراحات
البعض يرى انشاء جمعية للمدونين..والبعض يفضل ان يكون هذا المجتمع عبر الانترنت فقط حيث هذا هو مكانه الطبيعى...وراى اخرون ان تفعيل دور المدونين لا يتوقف عند حد القول فقط وانما يجب تجسيد الفكرة بافعال ومجهودات في خدمة المجتمع المصري..بينما فضل قليلون ان تظل لقاءتنا ذات عدد محدود حتى تتسم بالصداقة والحميمية كلقاءنا السابق

نموذج لاقتراح قد نال اعجابي الشخصي وتقديري
سمراء النيل...اقترحت علينا انجي ان نحول طاقتنا الكلامية ولقاءتنا تلك الى طاقة يستفيد بها الاخرون ومن هم في امس الحاجة الى مثل هذه الطاقات والمجهودات...كالاطفال الايتام وغيرهم من من يستطيع كل منا مساعدته..وقد شرحت وجهة نظرها في تدوينة هذا هو رابطهاا

http://anooojy.blogspot.com/2007/03/blog-post_09.html#links

رايي الشخصي...تحديد عدد من المدونين ليكونوا بمثابة منظمين مهام وحوارات اللقاء...ويتم اجتماعهم قبل اي لقاء...لتحديد المناقشات والنقاط المراد تسليط الضوء عليها وتحديد المكان والزمان....واقتراح ساقية اللصاوي اقتراح جيد جدا اذا امكن

وفي النهاية احب اقول الناس اللي شوفتها للمرة التانية اني كنت مبسوط قوي من رؤيتكم والناس الجديدة مرحبا بكم في هذا المجتمع اللي هنرسم كلنا ملامحه قريب

ومتفتكروش اني كده خلصت
تاني حاجة عايزة اتكلم عنها لقاءي التاريخي مع مصعب صاحبي صاحب مدونة مصعب الخير...صديقي الصدوق من ايام ثانوي..اللي الزمن فرقنا 5 سنين ونص ويوم لما اشوفه اشوفه في لقاء المدونين..سبحانك يا رب

مصعب: هو في حاجة تتاكل هنا؟
انا:هو انا طلبت شاي معرفش ايه النظام بقى
مصعب: ازيك يا محمد
انا: ايه ده....مصعببببببببببببببببببببببببب

احضان وكلام وذكريات وتمشية طويلة وقاعدة اطول....بجد يا مصعب وحشتني...من قلبي بقولك انك وحشتني..وانا محتاج اتكلم اكتر عن موضوعنا ده فقررت يبقى في بوست لوحده
يعيش السمك في الماء
يعيش
يعيش
يعيش
حمد الله عالسلامة يا صاحبي.. الدنيا مقدرتش تغلبنا لسة


فاكرني خلصت....بعينكم

احب اقولكم اعلان قصير عن حفلة فريق الصحبجية الثانية..والاعلان ده هيليه اعلان طويل في بوست منفرد

ان شاء الله

الصحبجية..فريق غنائي يتكون من 12 فرد اذا حسبنا الناس اللي كاتبة الكلام..بنغني اغاني كل اللي اقدر اقولهلكم انها من قلبنا..من جوانا..من جوه جوانا...كلام معظم الاغاني يا جماعة من تاليفي...اتمنى اني كل المدونين ينوروني يوم الحفلة ان شاء الله
اولا عشان اشوفكم وثانيا عشان اعرف رايكم في الجديد اللي احنا بنقدمه وبمناسبة الجديد...المرة دي انا كاتب
concept album
البوم ذو موضوع واحد لاول مرة على ما اعتقد تتعمل الفكرة دي في باند عربي..الالبوم مكون من اربع اغاني هكلمكم عنه في البوست الجاي ان شاء الله اللي غالبا هكتبه بكرة على الارجح
الالبوم اسمه
الدوّار
وبيدور عن حاجة مصرية قوي...قوي...حاجة فينا كلنا

الصحبجية....هتغني في ساقية الصاوي يو الثلاثاء 13 مارس....الثلاثاء القادم ان شاء الله الساعة 8 مساءاا
اتمنى اشوفكم كلكم هنااااااااك....وانتظروا مني تدوينة عن اعضاء الفريق وازاي اتكون وايه اللي احنا بنقدمه
في انتظاركم كلكم

صورة للصحبجية في حفلها السابق بحديقة الازهر بدون محمد عماد عازف الكمان وعمرو الزناتي عازف البركشن وابتهال ضيفة غناء الحفل القادم..ان شاء الله هعرفكم بيهم واحد واحد البوست الجاي على طول

For Further info please contact us:
E-mail: El-So7bageyya@hotmail.com or visit http://www.culturewheel.com/

الروتين

زحمة....الدنيا بقت زحمة قوي معايا الايام دي...مش بكلم على زحمة الناس..انا بتكلم عن زحمة الدماغ...بقيت ماشي بالدفع الذاتي خلاص...انا مشكلتي اني بزهق من الروتين..والسنة دي بقى عموما رمز للروتين القاتل...الكلية والمشروع والدنيا عموما بساقيتها اللي بندور فيها واخداني من كل حاجة بحبها..واخداني من الكتابة ومن اصحابي ومن الوقت اللي بعمل في الحاجات اللي بحبها..وواخداني من المدونة ومنكم...وحشتوني ووحشتني كل حاجة نفسي اعملها...بس الحمد لله اخيرا الحفلة بتاعة الصحبجية قربت...13\3 حاسه هيبقى يوم مختلف ان شاء الله...اني اسمع كلامي بيتغنى..احساس جميل اتمنى يفوقني شوية ويفكني من الساقية اللي انا مربوط بيها دي...واتمنى يكون كده بالنسبة لكم برضه ولكل حد هايجي يومها

وانا قاعد في سكشن..كانت حالتي عاملة زي الناس اللي في الصورة كده بالضبط...خرج مني الكلام ده..وعلى فكرة ده مش قصيدة ويمكن مش زجل كمان..ده مش حاجة تقريبا...هو شوية كلام كان جوايا وطلع...مش مهم هو ايه بس انا حاسه قوي على فكرة وواثق اني كلكم هتحسوه..حتى لو ما كانش بنفس طريقتي ولا بالاسلوب اللي انتوا متعودين عليه..يمكن عشان انا مش انا برضه الايام دي

----------

روتين

-------------

من مية سنة

حابك انا

وحاسك.. حياه

من مية سنة

عاشقك انا

وعشقك.. نجاه

من مييييية سنة

من اقبل ما اجي الكون

من قبل حتى ما اكون

ويتولد.. قلبي اللي تاه

من قبل ما امشي في الدروب

من قبل ما اعرف دي القلوب

من قبل ما تسير الصور ...في عكس الاتجاااه

اه ه ه

مليون سنة

عمرك يا قلبي في الحيااااه

ايام صور...والاصل في زحمتي مفقود

ايام صور...ولا قادر امشي ولا اعود

ايام صور

والتور مافكش دي القيود

فاضل دقائق من الصمود

ويثور

فاضل ثواني من الصمود

والنور..

يعوووووود

وقلبه اللي مات

فوق الحدود

يلقى حياه

وامله اللى ملّ

من الشرود

يلقاه

مليون سنة

حابك انا

وحاسك حياه

-----------------

M.H.R